რუსეთის პრეზიდენტმა ვლადიმირ პუტინმა რუსეთის სამხედრო-საზღვაო ძალების სამხედროებთან შეხვედრაზე განაცხადა, რომ, მისი აზრით, უკრაინა ადრე თუ გვიან დასავლეთ ტერიტორიებს დაკარგავს. მისი თქმით, მარცხენა სანაპირო კი „ყოველთვის რუსეთის ნაწილად მიიჩნეოდა“.
პუტინმა კვლავ განაცხადა, რომ „რუსეთის მხრიდან არანაირი აგრესია არ არსებობს“. მისი მტკიცებით, თითქოს რუსეთი „იძულებული გახდა სპეციალური სამხედრო ოპერაცია დაეწყო, რათა დაესრულებინა დასავლეთისა და კიევის რეჟიმის მიერ დაწყებული საბრძოლო მოქმედებები“.
მან ასევე განაცხადა, თითქოს დასავლეთ უკრაინა იოსებ სტალინის „საჩუქარი“ იყო, თუმცა, მისი თქმით, სტალინმა ეს ტერიტორიები უკრაინას კი არა, „ერთიანი სახელმწიფოს ფარგლებში“ გადასცა.
„სხვათა შორის, დარწმუნებული ვარ, ადრე თუ გვიან უკრაინა ამ დასავლეთ მიწებს დაკარგავს. იმას, რაც პოლონეთს, უნგრეთსა და რუმინეთს ეკუთვნოდა, ადრე თუ გვიან - შეიძლება არა ხვალ, არა ზეგ, ერთ, ორ, 10 ან 15 წელიწადში, ისტორიულად ყველაფერი თავის ადგილს დაუბრუნდება,“ - თქვა მან.
პუტინმა ასევე განაცხადა, რომ უკრაინის ტერიტორიული მთლიანობის ერთადერთი გარანტი რუსეთი იყო, მიუხედავად იმისა, რომ რუსეთი უკვე მეხუთე წელია სრულმასშტაბიან ომს აწარმოებს უკრაინის წინააღმდეგ.
„უკრაინის ტერიტორიული მთლიანობის მხოლოდ ერთი გარანტი არსებობდა - ეს იყო რუსეთი. მაგრამ მათ საჭიროდ, შესაძლებლად და საკუთარი თავისთვის სასიკეთოდ მიიჩნიეს, რუსეთი მტრად გამოეცხადებინათ, ხოლო რუსები უკრაინაში არატიტულოვან ერად გამოაცხადეს, რაც სრული სისულელეა“, - განაცხადა პუტინმა.
მან ასევე განაცხადა, რომ, მისი ინტერპრეტაციით, ისტორიულად უკრაინას ყოველთვის მარცხენა და მარჯვენა სანაპიროებად ყოფდნენ, ხოლო მარცხენა სანაპიროს უკრაინა „არა მხოლოდ რუსეთზე ორიენტირებულად, არამედ რუსეთის ნაწილადაც მიიჩნეოდა“.
პუტინის მტკიცებით, ვლადიმირ ლენინმა დონბასი რუსეთს კი არა, უკრაინას გადასცა, ახლა კი, მისი თქმით, რუსეთს „ყველაფრის ისტორიულ კალაპოტში დაბრუნება“ უწევს.
რუსეთის პრეზიდენტმა ასევე განაცხადა, რომ ომი უკრაინის წინააღმდეგ ადრე თუ გვიან დასრულდება, „მტერი დამარცხდება და გამარჯვება რუსეთის მხარეს იქნება“.
