კრემლის პრესსპიკერმა დმიტრი პესკოვმა რუსეთის გენშტაბის მთავარი ოპერატიული დეპარტამენტის უფროსის მოადგილის გენერალ იაროსლავ მოსკალიკის მკვლელობასთან დაკავშირებით კომენტარი გააკეთა. პესკოვმა აფეთქებაში უკრაინული მხარე დაადანაშაულა. მისი თქმით, კიევის რეჟიმის ქმედებები მიუთითებს მის მუდმივ მონაწილეობაზე რუსეთის შიგნით ტერორისტულ საქმიანობაში.
„კიევის რეჟიმი კიდევ ერთხელ აჩვენებს თავის არსს. კიევის რეჟიმი ჩვენი ქვეყნის ტერიტორიაზე კვლავ ჩართულია ტერორისტულ საქმიანობაში“, - განაცხადა პესკოვმა.
მისი თქმით, მომხდარი კიდევ ერთი დადასტურებაა იმისა, თუ რა მეთოდებისთვის არის მზად უკრაინული მხარე.
შეგახსენებთ, მოსკოვის ოლქში ავტომობილის აფეთქების შედეგად, რუსეთის გენშტაბის მთავარი ოპერატიული დეპარტამენტის უფროსის მოადგილე, გენერალი იაროსლავ მოსკალიკი დაიღუპა.
რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა, რომ გენერალი მოსკალიკი ტერორისტული თავდასხმის მსხვერპლი გახდა.
მან აღნიშნა, რომ არსებობს ვარაუდის საფუძველი, რომ დანაშაულის ორგანიზების უკან უკრაინის სპეცსამსახურები დგანან.
