იტალიის პრემიერ-მინისტრმა ჯორჯია მელონიმ უკრაინისთვის სამხედრო დახმარების მე-13 პაკეტის გამოყოფა შეაჩერა. მან აღნიშნული გადაწყვეტილება აშშ-ის კონგრესის შუალედური არჩევნების შედეგებს დაუკავშირა.
ამის შესახებ იტალიური გამოცემა Il Giornale d'Italia იუწყება.
გამოცემის ინფორმაციით, სამხედრო დახმარების მორიგი პაკეტი უკვე სრულად არის მომზადებული, თუმცა კიევისთვის მისი გადაცემის თარიღი ამ დრომდე შეთანხმებული არ არის. იტალიამ უკრაინას იარაღის ბოლო პარტია 10 თვის წინ მიაწოდა.
იტალიის მთავრობაში ხაზს უსვამენ, რომ დახმარების სრულად შეწყვეტაზე საუბარი არ არის.
გამოცემის ცნობით, დახმარების გაგზავნა არაერთხელ გადაიდო: თავდაპირველად შეფერხების მიზეზად ივლისიდან სექტემბრამდე ვადების გადაწევა დასახელდა, შემდეგ - პარტია „ლიგის“ ყრილობის მოლოდინი, ახლა კი გადაწყვეტილებას აშშ-ის შუალედურ არჩევნებს უკავშირებენ.
„ამრიგად, აშშ-ის პოლიტიკური კალენდარი იტალიის ამ მოლოდინის ახალ ორიენტირად იქცა. თუმცა, არ არის დაკონკრეტებული, არჩევნების რომელმა შედეგმა შეიძლება ხელი შეუწყოს გადაწყვეტილების მიღებას. არც ის არის გათვალისწინებული, რომ დახმარება კენჭისყრის დასრულებისთანავე გაიგზავნოს“, - წერს გამოცემა.
როგორც გამოცემა აღნიშნავს, სამხედრო დახმარების გაგზავნის გაჭიანურება იტალიის მთავრობის ადმინისტრაციაში დაძაბულობას იწვევს და საფრთხეს უქმნის იმ ვალდებულებებს, რომლებიც მელონიმ უკრაინის პრეზიდენტ ვოლოდიმირ ზელენსკისა და საფრანგეთის ლიდერ ემანუელ მაკრონის წინაშე აიღო.
იტალიის მთავრობა საჯაროდ კვლავ იმეორებს, რომ „უკრაინის მხარდაჭერა გაგრძელდება“. ამასთან, ოფიციალური პირები არ ასახელებენ არც დახმარების მიწოდების თარიღს და არც იმ დაბრკოლებებს, რომელთა გადალახვაც პაკეტის დასაბლოკად საჭირო შეზღუდვების მოსახსნელად არის აუცილებელი.
