ვის უნდა დავუპირისპირდე? მე გეტყვით, რომ მსგავსი არაფერი განიხილება, ეს არის წმინდა წყლის სპეკულაციები და ცალკეული ადამიანების მიერ გავრცელებული მიზანმიმართული დეზინფორმაციები, რასაც არაფერი აქვს საერთო სიმართლესთან, – ასე უპასუხა ირაკლი ღარიბაშვილმა პარტიის ოფისში გამართულ ბრიფინგზე ოპოზიური პარტიის შექმნასთან დაკავშირებით ჟურნალისტის კითხვას.
ირაკლი ღარიბაშვილმა კიდევ ერთხელ განმარტა, რატომ მიიღო პოლიტიკიდან წასვლის გადაწყვეტილება.
„მგონი, აბსოლუტურად სწორად ჩამოვაყალიბე და მაქსიმალური სიზუსტით ავხსენი ის ვითარება, რაც დღეს პარტიაში გვაქვს. ჩემთვის, როგორც რიგითი მოქალაქისთვის, გულწრფელად გეუბნებით და განცხადებაშიც ვთქვი, ამ ქვეყანაში მშვიდობისა და სტაბილურობის გარანტი არის ბიძინა ივანიშვილი. ის საპატიო მისია, რაც დამეკისრა ჩვენი პარტიის დამფუძნებლის მხრიდან, ჩემი პოლიტიკაში დაბრუნების შემდეგ ჯერ მინისტრად, შემდეგ პრემიერ-მინისტრად დანიშვნით, შემდეგ პარტიის თავმჯდომარედ არჩევით, კიდევ გავიმეორებ, მიმაჩნია, რომ ეს საპატიო მისია შევასრულე და დღეს ვეღარ ვხედავ პოლიტიკაში დარჩენის საჭიროებას. შესაბამისად, მინდა, ეს დრო გამოვიყენო ჩემი ოჯახისთვის, ჩემი პირადი მიზნების განსახორციელებლად და, უბრალოდ, მინდა, რომ ჩემი შესაძლებლობებიც მოვსინჯო სხვა სფეროში, ეს არის. ამიტომ, მინდა, გთხოვოთ ყველას, ნუღარ გავაგრძელებთ სპეკულაციებს, რატომ გადავდექი, როდის დავბრუნდები და ასე შემდეგ. ჯერ, ძალიან გთხოვთ, მაცალეთ წასვლა“, – აღნიშნა ღარიბაშვილმა.
ირაკლი ღარიბაშვილმა პოლიტიკიდან წასვლის შესახებ დღეს განაცხადა.
