ილონ მასკის Tesla-ს აქციები ორშაბათს, 10 მარტს, 15%-ზე მეტით დაეცა, რამაც წაშალა 2024 წლის ნოემბერში აშშ-ის საპრეზიდენტო არჩევნებში დონალდ ტრამპის გამარჯვების შემდეგ დაფიქსირებული ყველა მოგება.
Tesla-ს აქციების ფასმა პიკს დეკემბრის შუა რიცხვებში მიაღწია, როდესაც კომპანიის აქციები 480 დოლარად შეფასდა - ორჯერ მეტი, ვიდრე ტრამპის საარჩევნო კამპანიის დროს იყო, რომელშიც ელონ მასკი აქტიურ მონაწილეობას იღებდა.
ამჟამად, ერთი აქციის ფასი დაახლოებით 222 დოლარია, კომპანიის ჯამური ღირებულა 1.5 ტრილიონიდან 715 მილიარდამდე დაეცა.
შედარებისთვის, ამერიკული ავტო გიგანტის Ford-ის საბაზრო ღირებულება დაახლოებით 40 მილიარდი დოლარია, ხოლო General Motors-ის დაახლოებით 48 მილიარდი.
მედიის ცნობით, Tesla-ს აქციების ფასის მკვეთრმა ვარდნამ შესაძლოა პრობლემები თავად ელონ მასკსაც შეუქმნას. ვინაიდან მასკს კომპანიის აქციების გირაოთი უზარმაზარი სესხები აქვს აღებული, იგი მსოფლიოს ყველაზე მდიდარ ადამიანად ითვლება. თუმცა თუ აქციების ფასი დაეცემა გარკვეულ დონეს ქვემოთ, კრედიტორებმა შეიძლება მოითხოვონ დამატებითი გირაო. Bloomberg-ის შეფასებით, დღეს მასკის წმინდა ქონება კვლავ აჭარბებს 300 მილიარდ დოლარს.
ბევრი ექსპერტი ვარაუდობს, რომ მასკის მჭიდრო ურთიერთობა ტრამპთან გარკვეულ სარგებელს მოუტანს Tesla-ს. ტრამპის გაპრეზიდენტების შემდეგ, მასკი სათავეში ჩაუდგა მთავრობის ეფექტურობის დეპარტამენტს, რომელიც პასუხისმგებელია სახელმწიფო ხარჯებისა და საჯარო მოხელეთა რაოდენობის შეკვეცაზე. მას ფართო უფლებამოსილება მიენიჭა, თუმცა არა ავტოინდუტრიის სფეროში.
აქციებზე ფასების ვარდნის გარდა, Tesla სერიოზული მარეგულირებელი გამოწვევების წინაშე დგას. კერძოდ, ავტოპილოტით მართვის სისტემა აშშ-ს საავტომობილო გზებზე მოძრაობის უსაფრთხოების ეროვნული ადმინისტრაციის (NHTSA) მკაცრი შემოწმების ქვეშ იმყოფება მრავალი ავარიის გამო. იგივე სააგენტო შეასრულებს მთავარ როლს რობოტაქსის დამტკიცებაში, რომელზეც მასკი ფსონებს დებს.
გამოწვევების ფონზე, ილონ მასკს დონალდ ტრამპი მორიგ მხარდაჭერას უცხადებს. ცოტა ხნის წინ, მან განაცხადა, რომ აპირებს აღკვეთოს ბოიკოტი, რომელსაც „მემარცხენე შეშლილები Tesla-ს უცხადებენ“ და შეიძენს Tesla-ს ავტომობილს.
