შეწუხებული ვართ, რომ თუნდაც გამჭვირვალობის შესახებ კანონი მიღებულ იქნა პროტესტების ფონზე. ეს კანონი ეწინააღმდეგება ევროკავშირის ფასეულობებს და ის თუ ძალაში დარჩება, საქართველოსთვის ევროკავშირისკენ მიმავალი გზა დახურული იქნება, – ამის შესახებ გერმანიის ბუნდესტაგის დეპუტატმა, რობინ ვაგენერმა თბილისში გამართულ პრესკონფერენციაზე განაცხადა.
მისივე თქმით, ეს არ არის მხოლოდ გერმანიის მთავრობის პოზიცია, ეს არის ევროკომისიის პოზიცია.
„იმ ქვეყნისათვის, რომლის მოსახლეობის უმრავლესობას ევროკავშირში გაწევრიანება სურს და ეს მისწრაფება კონსტიტუციაშია გაწერილი, საერთოდ გაუგებარია, როგორ შეიძლება არსებობდეს ასეთი კანონი და როგორ შეიძლება ასეთი რიტორიკა გამოიყენებოდეს მათ მიმართ, ვინც [ევროკავშირისკენ] ამ გზაზე პარტნიორი უნდა იყოს. საქართველოს მოსახლეობას სურს ევროკავშირის წევრობა და იმ დროს, როდესაც უკრაინა და მოლდოვა იწყებენ მოლაპარაკებებს ამ მიმართულებით, საქართველომ გადაწყვიტა, ამ პროცესიდან განზე გამდგარიყო. მინდა ძალიან მკაფიოდ გითხრათ, თუ ე.წ. გამჭვირვალობის კანონი ძალაში იქნება, საქართველოსთვის ევროკავშირისკენ გზა იქნება დახურული. ეს არ არის მხოლოდ გერმანიის მთავრობის პოზიცია, ეს არის ევროკომისიის პოზიციაც, რომელიც ევროგაერთიანებაში მიღების შუაგულშია.
ჩვენ გადავხედავთ ასევე ევროკავშირის მიერ საქართველოსთვის გამოყოფილ დახმარების პროექტებს, ისევე როგორც ორმხრივი დახმარების პროექტებს, რომელსაც გერმანიის მთავრობა აწვდის საქართველოს“, – განაცხადა რობინ ვაგენერმა.
