მოვუწოდებთ საქართველოს ხელისუფლებას, მკაფიო გახადოს თავიანთი ზრახვები არსებული მოქმედების კურსის შეცვლით, რომელიც საფრთხეს უქმნის საქართველოს ევროკავშირისკენ მიმავალ გზას - ამის შესახებ ნათქვამია ევროპული საბჭოს სამიტის შემდეგ გამოქვეყნებულ დასკვნაში.
ევროპული საბჭო სერიოზულ შეშფოთებას გამოთქვამს საქართველოში ბოლო დროს განვითარებულ მოვლენებთან დაკავშირებით. დასკვნაში აღნიშნულია, რომ უცხოური გავლენის გამჭვირვალობის შესახებ კანონი წარმოადგენს კანდიდატის სტატუსის შესახებ კომისიის რეკომენდაციაში გათვალისწინებული ნაბიჯებისთვის უკანდახევას.
„ევროსაბჭო მოუწოდებს საქართველოს ხელისუფლებას, მკაფიო გახადონ თავიანთი ზრახვები არსებული მოქმედების კურსის შეცვლით, რომელიც საფრთხეს უქმნის საქართველოს ევროკავშირისკენ მიმავალ გზას და იწვევს გაწევრიანების პროცესის დე ფაქტო შეჩერებას.
ევროპული საბჭო მოგიწოდებთ, შეწყდეს მზარდი დაშინება, მუქარა და ფიზიკური თავდასხმა სამოქალაქო საზოგადოების წარმომადგენლების, პოლიტიკური ლიდერების, სამოქალაქო აქტივისტების და ჟურნალისტების წინააღმდეგ საქართველოში. იმ ღირებულებებისა და პრინციპების პატივისცემა, რომლებზეც დაფუძნებულია ევროკავშირი, აუცილებელია ნებისმიერი ქვეყნისთვის, რომელსაც სურს გახდეს წევრი.
ევროპული საბჭო მოუწოდებს საქართველოს ხელისუფლებას, უზრუნველყოს, რომ ამ შემოდგომის საპარლამენტო არჩევნები იყოს თავისუფალი და სამართლიანი და წაახალისოს პარტნიორების მიერ არჩევნების აქტიური გრძელვადიანი და მოკლევადიანი მონიტორინგი. ევროპული საბჭო განაგრძობს სიტუაციის ყურადღებით მონიტორინგს.
ევროპული საბჭო კიდევ ერთხელ ადასტურებს ურყევ მხარდაჭერას საქართველოს ტერიტორიული მთლიანობის მიმართ. ევროპული საბჭო კიდევ ერთხელ აღნიშნავს თავის ურყევ სოლიდარობას ქართველი ხალხის მიმართ და მზადყოფნას, განაგრძოს ქართველების მხარდაჭერა ევროპული მომავლისკენ მიმავალ გზაზე“,- აღნიშნულია ევროპული საბჭოს სამიტის შემდეგ გამოქვეყნებულ დასკვნაში.
პირველი არხი
