უწყებათაშორისი საკოორდინაციო საბჭოს გადაწყვეტილების თანახმად, 13 სექტემბრიდან მუნიციპალური ტრანსპორტი მუშაობას განაახლებს.
საკოორდინაციო საბჭომ, კორონავირუსის გავრცელების აღსაკვეთად, საზოგადოებრივი ტრანსპორტის მუშაობა 14 აგვისტოდან შეაჩერა. თავდაპირველად ტრანსპორტის მუშაობა 4 სექტემბრიდან უნდა აღდგენილიყო, თუმცა მოგვიანებით, შეზღუდვა 13 სექტემბრამდე გახანგრძლივდა.
მუნიციპალურ ტრანსპორტში კვლავინდებურად სავალდებულო იქნება პირბადის ტარება, რაც კახა კალაძის თქმით, მკაცრად გაკონტროლდება.
"ხვალიდან აღდგება საზოგადოებრივი ტრანსპორტი, რეგულაციებს რაც შეეხება, პირბადის ტარება მკაცრად იქნება გაკონტროლებული. თქვენ იცით, რომ თუ მგზავრს პირბადე არ აქვს, ავტობუსში არავითარ შემთხვევაში არ დაიშვება, ასევე იქნება მიკროავტობუსსა და მეტროში. მაქსიმალურად მივაწვდით იმ ადამიანებს პირბადეებს და მოწოდებები იქნება, რომ პირბადეებით მგზავრობა იყოს შესაძლებელი," - განაცხადა თბილისის მერმა.
