უძრავი ქონების პლატფორმა Georgia Real Estate-ი ოპერირებას განახლებული სტრატეგიით განაგრძობს. კომპანიას ამიერიდან ახალი გენერალური დირექტორი, გიორგი ვახტანგიშვილი უხელმძღვანელებს.

Georgia Real Estate-ი საქმიანობას ძირითადად, დეველოპერული მიმართულებით განაგრძობს. კომპანიის საქმიანობის სფერო აღარ იქნება სამშენებლო ბიზნესი. განახლებული სტრატეგიის მიზანია სამშენებლო რისკების დივერსიფიკაცია, რის შედეგადაც m² ბაზარზე მოქმედ სამშენებლო კომპანიებთან თანამშრომლობას გეგმავს.

აღსანიშნავია, რომ m² განიხილავს ახალი პროექტების განხორციელებას, ასევე განაგრძობს და დაასრულებს მიმდინარე პროექტებს, მათ შორის, საცხოვრებელი უბნის მშენებლობას გელოვანზე (m³), და სამშენებლო კომპანია “სვეტის“ მშენებლობებს მირცხულავაზე, ჭყონდიდელსა და ნუცუბიძის ქუჩებზე.

"მიხარია, რომ დავუბრუნდი გუნდს, რომელსაც დეველოპერული მიმართულებით მრავალწლიანი გამოცდილება აქვს და ამას m²-ის არაერთი წარმატებული პროექტი ადასტურებს. შესრულებული სამუშაოს მაღალი ხარისხი და მომხმარებელზე ორიენტირებული მომსახურების მოქნილი სისტემა, კომპანიის მთავარი ღირებულებებია. ჩვენთვის მნიშვნელოვანია, "სვეტის" სამი მიმდინარე პროექტის დასრულება, რომელიც სოციალური პასუხისმგებლობის ფარგლებში გადმოვიბარეთ", - აცხადებს Georgia Real Estate - ის გენერალური დირექტორი გიორგი ვახტანგიშვილი.

"მოხარული ვარ, რომ განახლებული სტრატეგიით, უცვლელი ძირითადი გუნდით და გიორგი ვახტანგიშვილის ხელმძღვანელობით, რომელიც 2013-2015 წლებში m²-ის გენერალური დირექტორის პოზიციას იკავებდა, m² დეველოპერული მიმართულებით კიდევ უფრო განვითარდება", - აცხადებს Georgia Real Estate - ის დირექტორთა საბჭოს თავმჯდომარე ირაკლი გილაური.