ქართულ ევრობონდებზე მოთხოვნის ოთხჯერადი მეტობა მიწოდებასთან შედარებით გამოხატავს უცხოური კაპიტალის მზაობას უფრო აქტიურად ჩაერთოს ჩვენს ქვეყანაში მიმდინარე ეკონომიკურ პროცესებში, აცხადებს ექსპერტი ეკონომიკის საკითხებში სოსო არჩვაძე, რომელიც საქართველოს მტავრობის მიერ ევრობონდემის ემისიას გამოეხმაურა. მისი განმარტებით, საქართველოს ფინანსთა სამინისტრომ პანდემიის პირობებში საერთაშორისო ფინანსურ ბაზარზე განახორციელა წარმატებული, საკმაოდ თამამი, მსხვილმასშტაბიანი და რაც მთავარია, ეფექტიანი ოპერაცია!
"უწყებამ 500 მილიონი დოლარის ობლიგაციები ხუთწლიანი ვადით განათავსა ბაზარზე წლიური 2.75 პროცენტის ოდენობით. – ეს დაახლოებით 2.6-ჯერ უფრო დაბალია წინა ხელისუფლების მიერ 2008 წლის გაზაფხულზე იმავე ზომის ევრობონდების საპროცენტო განაკვეთზე.
აღნიშნული ევრობონდების გამოშვება, ხასიათდება შემდეგი უაღრესად პოზიტიური ნიშნებით:
ჯერ ერთი, საერთაშორისო ბაზარზე ევრობონდები განთავსებულია ისტორიულად ყველაზე დაბალი პროცენტით, რაც საშუალებას აძლევს პანდემიით გამოწვეული სოციალური ვალდებულებებით დახუნძლულ საქართველოს სახელმწიფო ბიუჯეტს გასწიოს 350 მილიონი ლარის ეკონომია;
მეორე, საერთაშორისო ფინანსური ბაზრის მოთამაშენი, ინვესტორები მიუხედავად პანდემიით გამოწვეული ეკონომიკური კრიზისისა, ოპტიმისტურად აფასებენ ჩვენი ქვეყნის ეკონომიკურ მდგომარეობას, მის მაკროეკონომკურ მდგრადობას და რისკებს და თავიანთი დამოკიდებულებით ცალსახად ადასტურებენ მისი განვითარების პოზიტიურ ტრენდს;
მესამე, ქართულ ევრობონდებზე მოთხოვნის ოთხჯერადი მეტობა მიწოდებასთან შედარებით გამოხატავს უცხოური კაპიტალის მზაობას უფრო აქტიურად ჩაერთოს ჩვენს ქვეყანაში მიმდინარე ეკონომიკურ პროცესებში;
მეოთხე, საქართველოს ევრობონდებში ინვესტორები არიან ყველაზე მკაცრი და ობიექტური ფინანსური მონიტორინგის მქონე ქვეყნების (აშშ, ევროკავშირი, გაერთიანებული სამეფო...) წარმომადგენლები, რაც ფაქტობრივად მათდამი შესაბამისი სახელმწიფოებრივი მხარდაჭერისა და მოწონების არაპირდაპირი ინდიკატორია;
მეხუთე, პოზიტიური რეპუტაციული ფაქტორი, რომელსაც თვით პანდემიის პერიოდში არაერთხელ გაუსვეს ხაზი ავტორიტეტულმა საერთაშორისო სარეიტინგო სააგენტოებმა, შეუძლია დააჩქაროს საქართველოში სრულყოფილი კაპიტალის ბაზრის ფორმირება და დაჩქარებული განვითარება", აცხადებს ექსპერტი.
სოსო არჩვაძე მიიჩნევს, რომ აღნიშნულ წარმატებაში მნიშვნელოვანი წვლილი მიუძღვის თავად საქართველოს ფინანსთა სამინისტროს, მის მაღალპროფესიონალ, კვალიფიციურ პერსონალს და ხელმძღვანელობას. "მთლიანობაში კი მიღწეული ლოგიკური შედეგია იმ თანმიმდევრული ეკონომიკური პოლიტიკისა, რასაც საქართველოს ხელისუფლება ახორციელებს ბოლო წლებში ეკონომიკური რეფორმების, მაკროეკონომიკური სტაბილურობისა და ეროვნული მეურნეობის მდგრადი განვითარების უზრუნველყოფისათვის". ამბობს არჩვაძე.