ნაციონალური მოძრაობის თავმჯდომარე ნიკა მელიამ სასამართლო პროცესზე მოსამართლე ნინო ჩახნაშვილს ირაკლი კობახიძის დაკითხვის მოთხოვნით მიმართა. ფორმულას ინფორმაციით, მელია საუბრობს კობახიძის ინტერვიუზე, რომლითაც ირკვევა, რომ ქართული ოცნება მელიას დაპატიმრებას მოსამართლის გადაწყვეტილებამდე განიხილავდა.
მელიამ მოსამართლეს მიმართა, რომ თუ კობახიძე არ დაიკითხება, ეს მის რეპუტაციას დააზარალებს.
"მადლობა ყველა გულშემატკივარს, მადლობას ვუხდი მოსამართლეს და პროკურორ გულუაშვილს, მოტივაციას მაძლევ. სამართლის ცოდნა სულ არაა საჭირო, რომ ეს შუამდგომლობა დამიკმაყოფილოთ. როგორ შეიძლება იმ პირის დაკითხვა არ მოგინდეთ, ვინც თქვა, რომ მტკიცებულებები გააქრეს. თუ ამას არ დააკმაყოფილებთ ყველასთვის ნათელი გახდება, რას ემსახურებით.
რაც შეეხება კობახიძეს - სანამ მოსამართლევ, თქვენ აქ საუბრობდით, თურმე იმათ გადაწყვეტილება მიღებული ჰქონდა. ხომ თქვა ეს კობახიძემ, ხომ აღიარა?! თქვენ ხომ თქვენს რეპუტაციაზე უნდა იფიქროთ? ხელისუფლება შეიცველება, ცვლილებების პირას ვდგავართ, მომავალზე იფიქრეთ, რას იტყვიან 15-20 წლის მერე, ამ საქმეზე ხო დადგინდება ჭეშმარიტება. ეს ხომ ლაქად გაგყვებათ? კობახიძე მოწმის სახით რომ არ დაკითხოთ, თქვენს რეპუტაციას ხომ შებღალავს?" - მიმართა მელიამ მოსამართლეს პროცესზე.
მელიას ადვოკატი საქმეში ირაკლი კობახიძის აღნიშნული ინტერვიუს დართვას ითხოვენ. ადვოკატები ამბობენ, რომ ამით მტკიცებდა მოსაზრება, რომ მელიას დაკავების გადაწყვეტილება ქართულ ოცნებას წინასწარ ჰქონდა მიღებული.