„ნაციონალური მოძრაობის“ თავმჯდომარის ნიკანორ მელიას საქმის განხილვის ეტაპზე, ბრალდების მხარის მიერ იქნება წარმოდგენილი ყველა უტყუარი მტკიცებულება, რაც ცალსახად ადასტურებს მის მიერ ბრალად შერაცხული ქმედების ჩადენას, აცხადებს პროკურორი ამირან გულუაშვილი.
როგორც ცნობილია, თბილისის საქალაქო სასამართლოში ნიკანორ მელიას სისხლის სამართლის საქმის განხილვა გრძელდება.
"მოცემული საქმის განხილვის ეტაპზე ბრალდების მხარის მიერ იქნება წარმოდგენილი ყველა უტყუარი მტკიცებულება, რაც ცალსახად ადასტურებს ნიკანორ მელიას მიერ ბრალად შერაცხული ქმედების ჩადენას. საქმის არსებითი განხილვისას მოხდება მოწმეთა დაკითხვა, გამოკვლეული იქნება ვიდეოჩანაწერები, რომელიც ნათლად ასახავს ნიკანორ მელიას დანაშაულებრივ ქმედებებს, 2019 წლის 20 ივნისს განვითარებული მოვლენებისას. გამოკვლეული იქნება ყველა ის მტკიცებულება, რაც სასამართლოს ნათლად დაარწმუნებს მის ბრალეულობაში. მოცემულ საქმესთან დაკავშირებით, ყველა ასპექტში ბრალდების მხარე იქნება წარმოდგენილი უტყუარი მტკიცებულებებითა და მყარი პოზიციით, რასაც სასამართლო ნათლად დაინახავს ამ საქმის განხილვის ეტაპზე. ნიკანორ მელიას მიმართ წარდგენილი ბრალდების შესაბამისი საკანონმდებლო სტანდარტი არაერთხელ იქნა განხილული სასამართლოს მიერ, სასამართლომ არაერთხელ დაადასტურა, რომ არსებობს ერთი მხრივ, დასაბუთებული ვარაუდი მის მიერ დანაშაულის ჩადენისა და მეორე მხრივ, ალბათობის მაღალი ხარისხი მტკიცებულების სტანდარტთან დაკავშირებით. საქმეში მოიპოვება არაერთი მოწმის ჩვენება, ვიდეოჩანაწერი, რომელიც ადასტურებს ნიკა მელიას მხრიდან იმ ძალადობრივ ქმედებებში მონაწილეობას და ამ ძალადობრივი ქმედებების ორგანიზებას, რომელიც საბოლოო ჯამში, პარლამენტის სასახლის მიმდებარე ტერიტორიაზე განხორციელდა“,- განაცხადა ამირან გულუაშვილმა.
