ღარიბაშვილი ამ ქვეყანაში ვეღარ იცხოვრებს, თუ ნიკა მელიას ძალისმიერი მეთოდებით დაიჭერს. ამის შესახებ "ერთიანი საქართველო - დემოკრატიული მოძრაობის" ლიდერმა, ნინო ბურჯანაძემ ტელეკომპანია "პირველის" ეთერში განაცხადა.
მისი თქმით, ღარიბაშვილის პრემიერ-მინისტრობა ძალიან მალე დასრულდება.
"ირაკლი ღარიბაშვილის დანიშვნამ სრულიად დაგვანახა ის, რომ მართავს, რა თქმა უნდა, კვლავ ბიძინა ივანიშვილი. ერთმნიშვნელოვნად შემიძლია ვთქვა, აბსოლუტურად დარწმუნებული ვარ, რომ ღარიბაშვილი იყო პირველი პრემიერ-მინისტრი ამ ხელისუფლების და იქნება ბოლო პრემიერ-მინისტრი და ძალიან მალე დასრულდება მისი პრემიერ-მინისტრობა, მით უფრო იმ შემთხვევაში, თუ ის რაიმე ძალისმიერ გადაწყვეტილებას მიიღებს.
მე პირადად მის მიმართ ნამდვილად არანაირი აგრესი არა მაქვს, ყოველ შემთხვევაში ისეთ როგორიც შეიძლება სხვების მიმართ მქონდეს და ნამდვილად ვურჩევ იმას, რომ ნუ დაიღუპავს თავს, ახალგაზრდა კაცია. ის ამ ქვეყანაში ვეღარ იცხოვრებს, თუ გადაწყვეტს, რომ ნიკა მელია ძალისმიერი მეთოდებით დაიჭიროს და დაარბიოს ის ხალხი, ვინც ნიკა მელიას ირგვლივ არიან", - განაცხადა ბურჯანაძემ.
