ევროკომისიის პრეზიდენტი ურსულა ფონ დერ ლაიენი გმობს კრემლის მძაფრი კრიტიკოსის, ალექსეი ნავალნის დაკავებას და მის დაუყოვნებლივ გათავისუფლებას მოითხოვს. ამის შესახებ ევროკომისიის პრეზიდენტის განცხადებაში ვკითხულობთ.
ურსულა ფონ დერ ლაიენის განცხადებით, პოლიტიკური ოპონენტის დაკავება ეწინააღმდეგება რუსეთის მიერ აღებულ საერთაშორისო ვალდებულებებს.
"ვგმობ ალექსეი ნავალნის დაკავებას რუსეთის ხელისუფლების მიერ, მისი სამშობლოში დაბრუნების შემდეგ. რუსეთის ხელისუფლებამ დაუყოვნებლივ უნდა გაათავისუფლოს იგი და უზრუნველყოს მისი უსაფრთხოება.
პოლიტიკური ოპონენტის დაკავება ეწინააღმდეგება რუსეთის მიერ აღებულ საერთაშორისო ვალდებულებებს.
ჩვენ ასევე მოველით ნავალნის სიცოცხლეზე თავდასხმის დეტალურ და დამოუკიდებელ გამოძიებას. ჩვენ ყურადღებით დავაკვირდებით მოვლენათა განვითარებას", - ნათქვამია ევროკომისიის პრეზიდენტის სახელით გავრცელებულ განცხადებაში.
ნავალნის დაკავებას მალევე გამოეხმაურა ევროკავშირის საბჭოს პრეზიდენტი შარლ მიშელი, რომელმაც განაცხადა, რომ პოლიტიკოსის დაკავება მიუღებელია.
რუსი ოპოზიციონერი ალექსი ნავალნი გუშინ მოსკოვში, შერემეტევოს აეროპორტში დააკავეს.
დაკავებამდე აეროპორტში ნავალნიმ ჟურნალისტებს უთხრა, რომ ეს მისთვის საუკეთესო დღეა ბოლო ხუთი თვის განმავლობაში. მისი თქმით, ის ბედნიერია რუსეთში დაბრუნებით და სრულებით არ ეშინია დაპატიმრებისა და დევნის.
რუსეთის სასჯელაღსრულების ფედერალურმა სამსახურმა დაადასტურა ინფორმაცია, რომ ალექსეი ნავალნი სამართალდამცველებმა დააკავეს.
ალექსი ნავალნიმ რუსეთში დაბრუნების განზრახვის შესახებ 13 იანვარს განაცხადა.
12 იანვარს რუსეთის სასჯელაღსრულების ფედერალურმა სამსახურმა სასამართლოს ალექსეი ნავალნისთვის პირობითი სასჯელის რეალური განაჩენით შეცვლის მოთხოვნით მიმართა.
ნავალნის პირობითი სასჯელი და გამოსაცდელი ვადა „ივ როშეს“ საქმესთან დაკავშირებით ჰქონდა შეფარდებული.
ალექსეი ნავალნი გასული წლის აგვისტოში მოწამლეს ნერვული აგენტი "ნოვიჩოკით". ის სამკურნალოდ ბერლინში გადაიყვანეს, სადაც ექიმებმა მოახერხეს მისი გადარჩენა. კრემლმა არაერთხელ უარყო რაიმე სახის მონაწილეობა მის მოწამვლაში.
რუსეთის პრეზიდენტმა ვლადიმირ პუტინმა ყოველწლიურ პრესკონფერენციაზე განაცხადა, რომ ოპოზიციონერი პოლიტიკოსი ალექსეი ნავალნი "აშშ-ის სპეცსამსახურების მხარდაჭერით სარგებლობს" და დასძინა, რომ "რუსეთის სპეცსამსახურებს ნავალნის მოკვლა რომ ნდომოდათ, საქმეს ბოლომდე მიიყვანდნენ".