წარმომადგენელთა პალატის სპიკერი ნენსი პელოსი დონალდ ტრამპის იმპიჩმენტის საკითხის განხილვისას სიტყვით გამოვიდა.
ნენსი პელოსიმ დონალდ ტრამპს "აშკარა საფრთხე" უწოდა.
"ჩვენ ვიცით, რომ აშშ-ის პრეზიდენტმა წააქეზა აჯანყება, შეიარაღებული აჯანყება ჩვენი საერთო ქვეყნის წინააღმდეგ. ის უნდა წავიდეს. ის აშკარა საფრთხეს წარმოადგენს იმ ერისთვის, რომელიც ჩვენ ყველას გვიყვარს", - თქვა ნენსი პელოსიმ.
წარმომადგენელთა პალატის სპკერის თქმით, იმპიჩმენტი სენატმაც უნდა დაადასტუროს.
"პრეზიდენტს იმპიჩმენტი სენატმაც უნდა გამოუცხადოს, რაც უზრუნველყოფს რესპუბლიკის უსაფრთხოებას იმ ადამიანისგან, რომელსაც მტკიცედ აქვს გადაწყვეტილი, ყველაფერი გაანადგუროს, რაც ჩვენთვის ძვირფასია და რომელიც გვაერთიანებს", - თქვა ნენსი პელოსიმ.
მაღალი რანგის დემოკრატმა პოლიტიკოსმა ასევე განაცხადა, რომ მას გულს ტკენს იმპიჩმენტის კიდევ ერთ სხდომაზე ყოფნა. მისივე თქმით, იმპიჩმენტის პროცესის წამოწყება "პარტიულობით არ არის განპირობებული".
"მე თქვენს წინაშე ვდგავარ, როგორც კონსტიტუციის დამცველი, როგორც ცოლი, დედა, ბებია, ქალიშვილი - ქალიშვილი, რომლის მამა ამაყად მსახურობდა ამ კონგრესში. ჩემო თანამემამულეებო, ისტორიას ვერ გავექცევით. შევასრულოთ ჩვენი მოვალეობა და პატივი ვცეთ ჩვენი ერის ნდობას", - დასძინა ნენსი პელოსიმ.
შეერთებული შტატების კონგრესის წარმომადგენელთა პალატაში მოქმედი პრეზიდენტის დონალდ ტრამპის იმპიჩმენტის საკითხის განხილვა მიმდინარეობს.
წარმომადგენელთა პალატა დონალდ ტრამპს "ამბოხის წაქეზებაში“ სდებს ბრალს.
მოელიან, რომ დემოკრატების მიერ კონტროლირებადი წარმომადგენელთა პალატა დონალდ ტრამპის იმპიჩმენტსმ ხარს დაუჭერს.
ტრამპის იმპიჩმენტს მხარს უჭერს რამდენიმე რესპუბლიკელი კონგრესმენი, მათ შორის პარტიის ერთ-ერთი ლიდერი, ყოფილი ვიცე-პრეზიდენტის დიკ ჩეინის ქალიშვილი, ლიზ ჩეინი.
თუ წარმომადგენელთა პალატაში დამტკიცდება პრეზიდენტის იმპიჩმენტი, პროცესი საბოლოო გადასაწყვეტად სენატში გაგრძელდება.
სენატი მუშაობის განახლებას 19 იანვარს გეგმავს, შესაბამისად ნაკლებად სავარაუდოა ტრაპის უფლებამოსილების ოფიციალურად ამოწურვამდე მოესწროს იმპიჩმეტის საკითხის გადაწყვეტა.
მანამდე წარმომადგენელთა პალატამ მიიღო რეზოლუცია, რითაც კანონმდებლები შეერთებული შტატების ვიცე-პრეზიდენტ მაიკ პენსს კონსტიტუციის 25-ე შესწორების ამოქმედებისკენ მოუწოდებდნენ.
6 იანვარს ვაშინგტონში ტრამპის მომხრეები შეიკრიბნენ მის მხარდასაჭერად. ისინი შეიჭრნენ აშშ-ის კონგრესის შენობაში და შეწყვიტეს სხდომა, რომელზეც უნდა დამტკიცებულიყო ქვეყანაში ჩატარებული საპრეზიდენტო არჩევნების შედეგები. პოლიციასთან შეტაკების დროს ხუთი ადამიანი დაიღუპა.
მოგვიანებით, აშშ-ის კონგრესმა დაადასტურა საპრეზიდენტო არჩევნების შედეგები და ჯო ბაიდენი შეერთებული შტატების პრეზიდენტად ცნო.
კაპიტოლიუმის შტურმის შემდეგ, კონგრესის დემოკრატმა და ზოგიერთმა რესპუბლიკელმა წევრმა ტრამპი დაადანაშაულეს აჯანყების გაღვივებაში და მოითხოვეს მისი იმპიჩმენტი.
ამერიკელი კანონმდებლების ბრალდებებს დონალდ ტრამპი გაემოხმაურა და იმპიჩმენტის პროცესის წამოწყებას "კუდიანებზე ნადირობის გაგრძელება" უწოდა. მისივე თქმით, იმპიჩმენტი საშინელ რისხვას გამოიწვევს.
იმპიჩმენტის დამტკიცების შემთხვევაში დონალდ ტრამპი პირველი პრეზიდენტი იქნება ამერიკის ისტორიაში, რომელსაც იმპიჩმენტი ორჯერ გამოუცხადეს.
ამერიკის კონსტიტუციის 25-ე შესწორების მიხედვით, მთავრობის კაბინეტის წევრებს ხმათა უმრავლესობით და ვიცე-პრეზიდენტთან ერთად შეუძლიათ მიმართონ კონგრესის ორივე პალატის ლიდერს, რათა აცნობონ, რომ პრეზიდენტი ქმედუუნაროა და არ ძალუძს კონსტიტუციით გათვალისწინებული მოვალეობების შესრულება. ასეთ დროს, ქვეყნის მართვის სადავეები ვიცე-პრეზიდენტის ხელში გადადის.
კონგრესმენების მოწოდებას მაიკ პენსმა უარით უპასუხა.
შეგახსენებთ, 6 იანვარს ვაშინგტონში ტრამპის მომხრეები შეიკრიბნენ მის მხარდასაჭერად. ისინი შეიჭრნენ აშშ-ის კონგრესის შენობაში და შეწყვიტეს სხდომა, რომელზეც უნდა დამტკიცებულიყო ქვეყანაში ჩატარებული საპრეზიდენტო არჩევნების შედეგები. პოლიციასთან შეტაკების დროს ხუთი ადამიანი დაიღუპა.
მოგვიანებით, აშშ-ის კონგრესმა დაადასტურა საპრეზიდენტო არჩევნების შედეგები და ჯო ბაიდენი შეერთებული შტატების პრეზიდენტად ცნო.
