აშშ-ის კონგრესმა საპრეზიდენტო არჩენვებში ჯო ბაიდენის გამარჯვება ოფიციალურად დაამტკიცა. საარჩევნო კოლეგიის ხმები შემდეგნაირად გადანაწილდა: ჯო ბაიდენი - 306; დონალდ ტრამპი - 232.
სენატმა და წარმომადგენელთა პალატამ არ დააკმაყოფილეს ჯორჯიასა და პენსილვანიაში ბაიდენისთვის ხმების გაუქმების მოთხოვნები. ჩაიშალა არიზონას, ნევადას და მიჩიგანის შტატების შედეგების გაპროტესტების მცდელობაც. საპრეზიდენტო არჩევნების შედეგების დამტკიცებას წინ არეულობა უძღოდა.
კონგრესის სხდომა მას შემდეგ შეწყდა, რაც კაპიტოლიუმის შენობაში პრეზიდენტ დონალდ ტრამპის ულტრამემარჯვენე მომხრეები შეიჭრნენ.
მოქმედი პრეზიდენტის, დონალდ ტრამპის მომხრეები, რომელიც დაუღალავად აგრძელებს დაუსაბუთებელი ბრალდებების წამოყენებას არჩევნების გაყალბების შესახებ, აშშ-ის კონგრესის შენობაში შეიჭრნენ.
კონგრესში საპროტესტო აქციების მონაწილეების შეჭრისას ჯო ბაიდენის საპრეზიდენტო არჩევნებში გამარჯვების დადასტურება მიმდინარეობდა. მასობრივი არეულობის გამო, კონგრესის ორივე პალატა იძულებული გახდა სხდომა შეეწყვიტა.
გავრცელებული ცნობით, კაპიტოლიუმის შენობიდან ვიცე-პრეზიდენტ მაიკ პენსის, არჩეული ვიცე-პრეზიდენტის კამალა ჰარისის და წარმომადგენელთა პალატის სპიკერის ნენსი პელოსის ევაკუირება მოახდინეს.
გავრცელებული ინფორმაციით, კაპიტოლიუმის შემობაში გასროლაც მოხდა. დაიჭრა საპროტესტო აქციის ერთ-ერთი მონაწილე, რომელიც მოგვიანებით გარდაიცვალა. მედიის ინფორმაციით, არეულობის შედეგად კიდევ 3 ადამიანი გარდაიცვალა.
მანამდე საპროტესტო აქციის მონაწილეები თეთრ სახლთან იყვნენ თავმოყრილები, სადაც მათ დონალდ ტრამპმა მიმართა და განაცხადა, რომ არ აპირებს ჯო ბაიდენს თეთრი სახლი დაუთმოს. სწორედ ამის შემდეგ, გაემართნენ დემონსტრანტები კაპიტოლიუმისკენ.
ქალაქში შექმნილი ქაოსური მდგომარეობის გამო, ვაშინგტონის მერმა ერთი დღით კომენდანტის საათი გამოაცხადა, რომელიც მოგვიანებით 15 იანვრამდე გახანგრძლივდა.