საფრანგეთის საგარეო საქმეთა მინისტრმა ჟან-ნოელ ბარომ განაცხადა, რომ მისი ქვეყანა 10–11 ნოემბერს აბუ-დაბიში უკრაინის, აშშ-ისა და რუსეთის სამმხრივი შეხვედრის დროს „მოლაპარაკების მაგიდასთან იქნება“.
ბარომ ამის შესახებ რადიოსადგურ RTL-ის ეთერში განაცხადა.
ბაროს თქმით, რუსეთ-უკრაინის ომის საკითხზე დაგეგმილ მოლაპარაკებებზე ევროპელები სათანადოდ იქნებიან წარმოდგენილი.
„საფრანგეთი აბუ-დაბიში ჩავა, რათა ამ დისკუსიებში მონაწილეობა მიიღოს. ჯერჯერობით ვერ გეტყვით, ვინ წარმოადგენს საფრანგეთს ამ შეხვედრაზე, მაგრამ საფრანგეთი იქ აუცილებლად იქნება“, - განაცხადა მან.
ბარომ ასევე აღნიშნა, რომ ბოლო კვირების განმავლობაში ევროპელებმა საკუთარი პოზიცია მკაფიოდ დააფიქსირეს.
„მათ ამერიკელ შუამავალს ნათლად განუმარტეს, რომ კონტინენტის მომავალზე მსჯელობა ჩვენი მოლოდინებისა და მოთხოვნების უგულებელყოფით შეუძლებელია. საფრანგეთი უზრუნველყოფს, რომ ევროპის ხმა ისმოდეს, რადგან ევროპა ის მხარეა, რომელიც ამ ომის შედეგებს ყველაზე უშუალოდ განიცდის“,- განაცხადა ბარომ.
