შეერთებული შტატების დედაქალაქ ვაშინგტონში არეულობაა.
მოქმედი პრეზიდენტის, დონალდ ტრამპის მომხრეები, რომელიც დაუღალავად აგრძელებს დაუსაბუთებელი ბრალდებების წამოყენებას არჩევნების გაყალბების შესახებ, აშშ-ის კონგრესის შენობაში შეიჭრნენ.
კონგრესში საპროტესტო აქციების მონაწილეების შეჭრისას ჯო ბაიდენის საპრეზიდენტო არჩევნებში გამარჯვების დადასტურება მიმდინარეობდა. მასობრივი არეულობის გამო, კონგრესის ორივე პალატა იძულებული გახდა სხდომა შეეწყვიტა.
გავრცელებული ცნობით, კაპიტოლიუმის შენობიდან ვიცე-პრეზიდენტ მაიკ პენსის, არჩეული ვიცე-პრეზიდენტის კამალა ჰარისის და წარმომადგენელთა პალატის სპიკერის ნენსი პელოსის ევაკუირება მოახდინეს.
გავრცელებული ინფორმაციით, კაპიტოლიუმის შემობაში გასროლაც მოხდა. დაჭრილია საპროტესტო აქციის ერთ-ერთი მონაწილე.
მანამდე საპროტესტო აქციის მონაწილეები თეთრ სახლთან იყვნენ თავმოყრილები, სადაც მათ დონალდ ტრამპმა მიმართა და განაცხადა, რომ არ აპირებს ჯო ბაიდენს თეთრი სახლი დაუთმოს. სწორედ ამის შემდეგ, გაემართნენ დემონსტრანტები კაპიტოლიუმისკენ.
ქალაქში შექმნილი ქაოსური მდგომარეობის გამო, ვაშინგტონის მერმა ერთი დღით კომენდანტის საათი გამოაცხადა.
დემოკრატიული პარტიის წევრები, ისევე როგორც ტრამპის თანაპარტიელი რესპუბლიკელების დიდი ნაწილი მოუწოდებენ დონალდ ტრამს, დაგმოს ძალადობრივი ქმედებები და თავის მომხრეებს სიმშვიდისკენ მოუწოდოს.