შაბათს, 7 ნოემბერს, საღამოს, მოსკოვში, მეტროსადგურ „კიტაი-გოროდის“ მიმდებარე ტერიტორიაზე პოლიციამ რეიდი ჩაატარა.
Telegram-არხ Baza-ს ინფორმაციით, სამართალდამცველებმა 200-ზე მეტი ადამიანი დააკავეს, რომელთა შორის ბევრი არასრულწლოვანი იყო. სხვა Telegram-არხის ცნობით დაკავებულთა რაოდენობა 300-მდე იყო.
დაკავებულთა ნაწილმა მედიას განუცხადა, რომ პოლიციელები მათ ემუქრებოდნენ და ფიზიკურად ძალადობდნენ. ერთ-ერთი რესპონდენტის თქმით, პოლიციის ავტომობილში მყოფ სრულწლოვანი პირებისგან სამხედრო საკონტრაქტო სამსახურის გაფორმებას მოითხოდნენ.
დაკავებულთა განცხადებით, არასრულწლოვნებს საპირფარეშოთი სარგებლობის უფლებასაც არ აძლევდნენ. მათ პოლიციელები ეუბნებოდნენ: „ვერაფრით დაგეხმარებით, ან შარვალში მოშარდეთ, ან ხესთან დაჯარიმდებთო“.
კიდევ ერთი დაკავებულის ინფორმაციით, დაკავებულები ტაგანსკის რაიონის პოლიციის განყოფილებაში გადაიყვანეს, სადაც მათ სამხედრო აღრიცხვისა და გაწვევის კომისარიატში გამოცხადების უწყებებს ურიგებდნენ. მისი თქმით, უწყებები გადასცეს სტუდენტ ქალებსაც კი, რომლებსაც სამხედრო სამსახურში გაწვევისგან კანონით გათვალისწინებული გადავადება აქვთ.
ამასთან, მოსკოვის შინაგან საქმეთა სამინისტროს მთავარ სამმართველოში რეიდს „პროფილაქტიკური ღონისძიებები“ უწოდეს. სამართალდამცველებმა ღონისძიების ერთ-ერთ მიზნად საზოგადოებრივ ადგილებში ალკოჰოლური სასმელების მოხმარების აღკვეთა დაასახელეს.
მოგვიანებით პოლიციის განყოფილებებიდან დაკავებულთა ნაწილის გათავისუფლება დაიწყეს.
