შეერთებული შტატების ვიცე-პრეზიდენტმა მაიკე პენსმა უარი თქვა დონალდ ტრამპის გადასაყენებლად კონსტიტუციის 25-ე შესწორების ამოქმედებაზე. აღნიშნულთან დაკავშირებით მაიკ პენსმა კონგრესის წარმომადგენელთა პალატის სპიკერს, ნენსი პელოსის წერილი მისწერა.
"მე არ მჯერა, რომ მოქმედების ასეთი კურსი ჩვენი ერის ინტერესებში შედის ან შეესაბამება ჩვენს კონსტიტუციას", - წერს პენსი წერილში.
პელოსისადმი მიწერილ წერილში პენსი აღნიშნავს, რომ გასულ კვირას ის არ დამორჩილდა ზეწოლას, როდესაც მისგან არჩევნების შედეგების უარყოფას მოითხოვდნენ და ამჯერად არ აპირებს წარმომადგენელთა პალატას პოლიტიკურ თამაშებში აჰყვეს.
მისივე თქმით, 25-ე შესწორების ამოქმედება "საშინელ პრეცენდენტს შექმნის".
მაიკ პენსი მოუწოდებს ნენსი პელოსის და კონგრესის სხვა წევრებს, ჯო ბაიდენის ინაუგურაციისთვის მზადების ფონზე, ხელი შეუწყონ "ტემპერატურის დაწევას და ერის გაერთიანებას".
ვიცე-პრეზიდენტმა პირობა დადო, რომ იგი ყველა ღონეს მიმართავს, რათა ძალაუფლების გადაცემის პროცესი მშვიდობიანად დაგვირგვინდეს.
ამერიკის კონსტიტუციის 25-ე შესწორების მიხედვით, მთავრობის კაბინეტის წევრებს ხმათა უმრავლესობით და ვიცე-პრეზიდენტთან ერთად შეუძლიათ მიმართონ კონგრესის ორივე პალატის ლიდერს, რათა აცნობონ, რომ პრეზიდენტი ქმედუუნაროა და არ ძალუძს კონსტიტუციით გათვალისწინებული მოვალეობების შესრულება. ასეთ დროს, ქვეყნის მართვის სადავეები ვიცე-პრეზიდენტის ხელში გადადის.
მაიკ პენსის უარის შემდეგ, წარმომადგენელთა პალატა გეგმავს კონგრესში პრეზიდენტ ტრამპის იმპიჩმენტის აღძვრას.
დემოკრატები და რესპუბლიკელთა ნაწილი დონალდ ტრამპს ადანაშაულებენ ვაშინგტონში მომხდარ არეულობაში, რასაც საკანონმდებლო ორგანოზე თავდასხმა მოჰყვა.
შეგახსენებთ, 6 იანვარს ვაშინგტონში ტრამპის მომხრეები შეიკრიბნენ მის მხარდასაჭერად. ისინი შეიჭრნენ აშშ-ის კონგრესის შენობაში და შეწყვიტეს სხდომა, რომელზეც უნდა დამტკიცებულიყო ქვეყანაში ჩატარებული საპრეზიდენტო არჩევნების შედეგები. პოლიციასთან შეტაკების დროს ხუთი ადამიანი დაიღუპა.
მოგვიანებით, აშშ-ის კონგრესმა დაადასტურა საპრეზიდენტო არჩევნების შედეგები და ჯო ბაიდენი შეერთებული შტატების პრეზიდენტად ცნო.
კაპიტოლიუმის შტურმის შემდეგ, კონგრესის დემოკრატმა და ზოგიერთმა რესპუბლიკელმა წევრმა ტრამპი დაადანაშაულეს აჯანყების გაღვივებაში და მოითხოვეს მისი იმპიჩმენტი.