რესპუბლიკელი კონგრესმენი ადამ კინზინგერი შეერთებული შტატების მოქმედი პრეზიდენტის, დონალდ ტრამპის წინააღმდეგ ამერიკის კონსტიტუციის 25-ე შესწორების ამოქმედებას და მის თანამდებობიდან ჩამოშორებას მოითხოვს.
მისი თქმით, ტრამპის გადაყენება იქნება სწორი გადაწყვეტილება, რაც ამერიკის დემოკრატიისთვის აუცილებელია.
"დროა ავამოქმედოთ 25-ე შესწორება და დავასრულოთ ეს კოშმარი", - განაცხადა კინზინგერმა მიკრობლოგ "ტვიტერზე" გავრცელებულ ვიდეომიმართვაში.
კონგრესმენის თქმით, აშკარაა, რომ დონალდ ტრამპი შორს დგას როგორც არსებული რეალობიდან, ასევე იმ ვალდებულებებისა და ფიცისგან, რომელიც მან დადო ინაუგურაციისას.
დონალდ ტრამპის თანამდებობიდან გადაყენებას ითხოვს სენატის დემოკრატი ლიდერი ჩაკ შუმერი.
ამერიკის კონსტიტუციის 25-ე შესწორების მიხედვით, მთავრობის კაბინეტის წევრებს ხმათა უმრავლესობით და ვიცე-პრეზიდენტთან ერთად შეუძლიათ მიმართონ კონგრესის ორივე პალატის ლიდერს, რათა აცნობონ, რომ პრეზიდენტი ქმედუუნაროა და არ ძალუძს კონსტიტუციით გათვალისწინებული მოვალეობების შესრულება.