გერმანიის პრეზიდენტი ფრანკ-ვალტერ შტაინმაიერი სახელმწიფო ვიზიტის ფარგლებში სრულიად საქართველოს კათოლიკოს-პატრიარქ ილია მეორეს შეხვდა.
მოხარული ვარ თქვენო უწმინდესობავ, ჩემთვის დიდი პატივია თქვენი გაცნობა, – ასე მიმართა საქართველოს კათოლიკოს-პატრიარქ ილია მეორეს გერმანიის პრეზიდენტმა ფრანკ-ვალტერ შტაინმაიერმა.
ილია მეორემ სტუმრები დალოცა
"გულითადად მოგესალმებით თქვენ, თქვენს მეუღლეს და თანმხლებ პირებს საქართველოს ეკლესიის სახელით და პირადად ჩემი სახელით. თქვენი ვიზიტი მეტად მნიშვნელოვანია და ჩვენი ხალხი დიდი იმედით უყურებს თქვენს ვიზიტს. მოგეხსენებათ პრობლემები ბევრია მთელს მსოფლიოში და მათ შორის საქართველოში. მიგვაჩნია, რომ ყველაზე დიდი და მტკივნეული პრობლემა არის ტერიტორიული მთლიანობის პრობლემა. 20 პროცენტი მიტაცებული არის უცხო ქვეყნის მიერ, მაგრამ მინდა ვთქვა, რომ რუსეთსაც მძიმე ტვირთად აქვს ეს პრობლემა. ყველაფერი უნდა გაკეთდეს, რათა ეს პრობლემა გადაწყდეს. მიგვაჩნია, რომ გერმანიას აქვს იმდენი ძალა და ავტორიტეტი, რომ აქტიური მონაწილეობა მიიღოს ამ პროცესში. ჩემი აზრით, სამხედრო ბაზები უნდა იყოს აღებული ამ ტერიტორიებიდან. თქვენ ისეთი გზა გაქვთ გამოვლილი დიპლომატიურ მუშაობაში, რომ არ გაგიჭირდებათ ამის ადგილიდან დაძვრა. კიდევ ერთხელ მოგესალმებით და იმედით ვუყურებთ თქვენს ვიზიტს", - მიმართა ილია მეორემ ფრანკ-ვალტერ შტაინმაიერს.
პატრიარქის მიმართვას "პირველი არხი" ავრცელებს.
