„პირდაპირ ვამბობ, სმიტზე სექსუალური ძალადობის ფაქტს არ ვადასტურებ და წინასწარ გავრცელებულ ინფორმაციას სანდოდ არ მივიჩნევ. ეს ბრალდებულის მიმართ მიზანმიმართულად შავი პიარის აგორებას ემსახურება“, - განაცხადა „ჯი-ეიჩ-ენთან“ ხადას ხეობაში სმიტების ოჯახის წევრების მკვლელობაში ბრალდებული მწყემსის, მალხაზ კობაურის ადვოკატმა, დავით გირგვლიანმა.
არსებული ინფორმაციით, აღნიშნული მკვლელობის საქმეზე ექსპერტიზის წინასწარი დასკვნა უკვე მომზადებულია, სადაც აღნიშნულია, რომ მსხვერპლს სექსუალური ძალადობის კვალი აღენიშნება. სწორედ აღნიშნულ ძალადობას არ ადასტურებს ადვოკატი და აცხადებს, რომ დასკვნების გაკეთება ნაადრევია.
„ეს დასკვნა არ გადმომცემია, შესაბამისად, მისი შინაარსი ჩემთვის ცნობილი არ არის. დასკვნას დეტალურად მაშინ შევაფასებ, როცა ეს დასკვნა გადმომეცემა და სასამართლოში მის გამცემ ექსპერტს დავკითხავ“, - აღნიშნავს გირგვლიანი.
ის საქმეში FBI-ის გამომძიებლების დროულ ჩართვას მოითხოვს. ამასთანავე, ადვოკატი საქართველოში ჩატარებულ ექსპერტიზას უნდობლობას უცხადებს და სურს, ყველა საჭირო ექსპერტიზა ამერიკულმა მხარემაც ჩაატაროს.
„მოვითხოვ, აღნიშნული ექსპერტიზა ამერიკულმა მხარემაც ჩაატაროს და არც იმას გამოვრიცხავ, რომ დაცვის მხარემაც საკუთარი ინიციატივით იგივე ექსპერტიზის დანიშვნა მოითხოვოს“, -დასძენს ადვოკატი.
როგორც ის განმარტავს, ბრალდებული მწყემსის ჩვენება, რომელიც მედიის საშუალებით გავრცელდა, ბრალდების მხარის მიერაა გასაჯაროებული.
„რაც შეეხება საქმის მასალებს, დანამდვილებით შემიძლია ვთქვა, რომ ის ბრალდების მხარემ გაასაჯაროვა იმისათვის, რომ მიზანმიმართული, ბინძური შავი პიარი აწარმოოს, 19 წლის მწყემსი ბიჭუნას წინააღმდეგ. ამის შემდეგ, ბრალდების მხარემ გაუთქმელობაზე ხელის მოწერა რომ მთხოვოს, დოკუმენტს ხელს არ მოვაწერ, ვინაიდან ამ ინტერესით თავად ბრალდების მხარე არ მოქმედებს. მათთვის მთავარი მიზანი არა ობიექტური ჭეშმარიტების დადგენაა, არამედ, შავი პიარის აგორებაა 19 წლის მწყემსი ბიჭუნას წინააღმდეგ, რომელიც შესაძლებელია სრულიად უდანაშაულო იყოს ბრალად წარდგენილი უმძიმესი დანაშაულის ჩადენაში“, - აცხადებს გირგვლიანი.
