„შსს-ში დღეს მთავარი პრიორიტეტია საგამოძიებო კომპონენტის გაძლიერება", - ამის შესახებ საქართველოს პრემიერ-მინისტრმა მამუკა ბახტაძემ პარლამენტის პლენარულ სხდომაზე სიტყვით გამოსვლის დროს განაცხადა.
როგორც მამუკა ბახტაძემ აღნიშნა, განხორციელდება საპატრულო პოლიციის რეფორმის ახალი ეტაპი, რომელიც მნიშვნელოვნად გააუმჯობესებს როგორც საპოლიციო საქმიანობის ეფექტიანობას და გამჭვირვალობას, ასევე მოახდენს ადმინისტრაციული პროცესების გამარტივებას, საპოლიციო სერვისების ხელმისაწვდომობის ზრდას, თანამედროვე ტექნოლოგიების დანერგვასა დანაყოფების სტრუქტურულ ოპტიმიზაციას.
"სამინისტროს წარმოდგენილი აქვს კონკრეტული ხედვა და ამ ხედვის იმპლემენტაცია უმოკლეს ვადებში მოხდება. ამავდროულად, ჩვენ გავაგრძელებთ ინვეტიციებს ტექნოლოგიებში, რომ უფრო ეფექტურად მოვახდინოთ ჩვენს საზოგადოებაში კრიმინალის პრევენცია. ასევე, მინდა ყურადღება გავამახვილო, რომ ჩვენ გავაგრძელებთ ინვესტიციებს საგანგებო სიტუაციების სამსახურის გასაძლიერებლად. ბოლო მოვლენებმა ჩვენ კიდევ ერთხელ კარგად გვაჩვენა, რომ ამ კუთხით გამოწვევები იზრდება და აუცილებელია, ჩვენ ბიუჯეტში გამოყოფილი გვქონდეს შესაბამისი თანხები, რომელიც საშუალებას მოგვცემს, ამ გამოწვევებს ეფექტურად გავუმკლავდეთ”, – განაცხადა მამუკა ბახტაძემ.