კოლეგებო, გადაშალეთ მამუკა ბახტაძის მიერ წარმოდგენილი სამთავრობო პროგრამის პირველი გვერდი. წინასიტყვაობა გიორგი კვირიკაშვილის მიერ წამოდგენილი პროგრამის წინასიტყვაობას შევადარე და ჰოი საოცრებავ! ოთხი აბზაციდან ორი სრულად, კოფი-ფეისტით არის გამოდმოტანილი, ხოლო ერთი - ნაწილობრივ. შეგიძლიათ გაჰყვეთ დანარჩენ ტექსტს, - ამ სიტყვებით პარლამენტის რიგგარეშე სხდომაზე, უმრავლესობას უმცირესობის წევრმა ზურაბ ჭიაბერაშვილმა მიმართა.
როგორც ის განმარტავს, თუკი, ამ მთავრობასაც იგივე შემადგენლობით ირჩევდნენ, რატომ მოხსნეს კვირიკაშვილი დაკავებული თანამდებობიდან.
"თუ იგივე პროგრამით უნდა აირჩიოთ ეს მთავრობა, იმ კაცს რატომ უშვებდით სახლში?! თუ სამთავრობო პროგრამას ინფრასტრუქტურის განვითარების გვერდზე გადავშლით, აქაც 90% არის იგივე ტექსტი. წაშლილი არის მხოლოდ ერთი წინადადება - კერძოდ, გიორგი კვირიკაშვილს ეწერა და ამაზე ზურაბ ალავიძეც ბევრს ლაპარაკობდა, რომ 2020 წლამდე დაიგება 800 კილომეტრზე მეტი სიგრძის, 3.5-მილიარდი დოლარის ღირებულების საგზაო ინფრასტრუქტურა. აქედან ყველაფერი გადმოიტანეთ და მხოლოდ ეს წინადადება წაშალეთ, რომ რიცხვი არ იყოს და შემდეგ პასუხი არ მოგკითხოთ. რატომ წაშალეთ, არ გაქვთ იმედი, რომ ამ კილომეტრაჟის გზას დააგებთ?“ - მიმართა ჭიაბერაშვილმა ბახტაძეს პარლამენტის პლენარულ სხდომაზე.