„ეს არის რეალობა, რომელსაც თვალის გასწორება სჭირდება, მუშაობა სჭირდება და ვფიქრობ, ადრე თუ გვიან, ეს ხნულები იქნება გაუქმებული და ადამიანები გაერთიანდებიან,“ - ეს განცხადება საპარლამენტო უმრავლესობის წევრმა, გია ვოლსკიმ, სოფელ ნიქოზში საოკუპაციო რეჟიმის მიერ ხნულების გავლებასთან დაკავშირებით გააკეთა.
მისი თქმით, "ნაციონალურ მოძრაობას" და მის საინფორმაციო საშუალებებს საგანგებო ამოცანა აქვთ, რომ საზოგადოებას შეუქმნან შთაბეჭდილება, თითქოს ხელისუფლება საერთაშორისო დონეზე არ ლაპარაკობს. ამასთან, ის ამბობს, რომ ამ საკითხს პატრულირება ვერ მოაგვარებს და ყველაფერს 2008 წელს სააკაშვილის ქმედებებს უკავშირებს.
"პატრულირების თემა ამ საკითხს ვერ წყვეტს. ამ საკითხს წყვეტს ის სავალალო ფაქტი, რომელიც დაუშვა ხელისუფლებამ მაშინ, როცა ვერ გათვალა და არ დაუჯერა მოკავშირე ქვეყნებს, ჩაება ისეთ ავანტიურაში, რომელმაც ოკუპაციამდე მიგვიყვანა. დაპირისპირება შესაძლებელია, თუმცა ხნულების გავლება მიმდინარეობს იმ ხაზზე, რომელიც 2008 წლის ბრძანებულებით პრეზიდენტმა სააკაშვილმა დაადგინა, როგორც საბჭოთა კავშირის პერიოდის საზღვარი და ომის შემდეგ სწორედ ამ ხაზს მიუყვება ეს ხნული. ეს არის რეალობა, რომელსაც თვალის გასწორება სჭირდება, მუშაობა სჭირდება და ვფიქრობ, ადრე თუ გვიან ეს ხნულები იქნება გაუქმებული და ადამიანები გაერთიანდებიან," - განაცხადა გია ვოლსკიმ.