დღესდღეობით, საფუძველი რომ არსებობდეს, ბატონი სუბელიანი პასუხისგებაში იქნებოდა მიცემული - განაცხადა ჟურნალისტებთან ხორავას ქუჩაზე მოზარდებს შორის მომხდარი მკვლელობის საქმის პროკურორმა, ზვიად ფხაკაძემ.
მისი განმარტებით, დღეს დაკითხული მოწმის, ლუკა კალანდიას ჩვენებით მნიშვნელოვანი გარემოებები დადასტურდა.
„დაიკითხა კონფლიქტის მონაწილე ერთ-ერთი პირის ძმა, რომელმაც ისაუბრა შემთხვევის ადგილიდან მისი ძმისა და ერთ-ერთი ბრალდებულის წამოყვანასთან დაკავშირებით. დღევანდელი მოწმე კონკრეტულად საუბრობდა იმ დეტალებზე, რაც მისთვის იყო ცნობილი, კერძოდ მისი ჩვენებიდან მნიშვნელოვანი გარემოებები იყო დადასტურებული, მათ შორის ის, რომ მისმა ძმამ 11 აპრილს სასამართლოში დაკითხვისას მეგობრების გადასარჩენად, მათთვის სასარგებლო ჩვენება მისცა. ამ სხდომის დასრულების შემდეგ მოწმის ჩვენებით მისი ძმა იყო ანერვიულებული და გრძნობდა სინდისის ქეჯნას დაზარალებულების მშობლების მიმართ. სწორედ ეს იყო იმის განმაპირობებელი, რომ მან 13 აპრილს სასამართლოს სრყლყოფილი ინფორმაცია მიაწოდა საქმის დეტალებთან დაკავშირებით. 13 აპრილს და შემდგომ სხდომებზე მ.კ.-ს მიერ სასმაართლოსთვის მიწოდებული ინფორმაცია აბსოლუტურ თანხვედრაშია საქმის მასალებთან და სხვა მოწმეების მტკიცებულებებთან“, - აცხადებს ფხაკაძე.
რაც შეეხება იმ ფაქტს, რომ ყოფილი პროკურორი, მირზა სუბელიანი ხორავას ქუჩაზე მომხდარი მკვლელობის შემდეგ კალანდიებთან სახლში იმყოფებოდა, არც პროკურორი ფხაკაძე უარყოფს.
„მოწმემ ასევე ისაუბრა მირზა სუბელიანთან დაკავშირებით და მასთან ნათესაური კავშირი დაადასტურა. ასევე თქვა, რომ მირზა სუბელიანი 2017 წლის 1 დეკემბერს მივიდა მათთან სახლში, თუმცა მის ძმას არ უნახავს სუბელიანი ვის და რაზე ესაუბრა. მოწმეს ამის თაობაზე ინფორმაცია არ აქვს. მან ასევე თქვა, რომ პერიოდულად გადიოდა სახლიდან და მოხდა თუ არა მირზა სუბელიანს, მის ძმასა და ბრალდებულს შორის შეხვედრა, ნახეს თუ არა ერთმანეთი, ამაზე ინფორმაცია არ გააჩნია. აღბიშნულთან დაკავშირებით, საქმეზე მირზა სუბელიანი დაკითხულია. ის ასევე დაცვის მხარის მიერ დასაკითხ მოწმეთა სიაშია შეყვანილი და იმედია, დაცის მხარე წარმოადგენს მას, სადაც ეს კითხვები დაესმება“, - აცხადებს ფხაკაძე.
როგორც ის განმარტავს, სუბელიანის პასუხისგებაში მიცემის საფუძველი ამ ეტაპზე არ არსებობს.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.