„აღნიშნული მოწმის ჩვენებით ნამდვილად დადასტურდა კონკრეტული პირის მის სახლში ყოფნა. მიუხედავად იმისა, რომ სხვა მოწმეების მიერ ეს ფაქტი უარყოფილი იყო, ამ მოწმემ ეს დაადასტურა და ისაუბრა“, - განაცხადა ჟურნალისტებთან ხორავას ქუჩაზე მომხდარი მკვლელობის საქმეზე ერთ-ერთი არასრულწლოვანი ბრალდებულის ადვოკატმა, ტარიელ კაკაბაძემ.
დღევანდელ სასამართლო სხდომაზე იმ ერთ-ერთი მთავარი მოწმის ძმა დაიკითხა, რომელმაც სასამართლოშიც და გამოძიების ეტაპზეც ჩვენება 5-ჯერ შეცვალა. დღეს დაკითხული მოწმე აღნიშნულ საქმეზე დანაშაულის შეუტყობინებლობაზეა ბრალდებული.
„დღევანდელ სხდომაზე ბრალდების მხარის მთავარი მოწმის ძმა დაიკითხა, რომელმაც სასამართლოს განსხვავებული ინფორმაცია მიაწოდა იმასთან დაკავშირებით, თუ როგორ განვითარდა მოვლენები დაჭრის შემდეგ, მის სახლში ვინ იმყოფებოდა, როგორ დამალეს გარკვეული პირები და ა.შ. აშკარად იკვეთება რომ კონკრეტულმა, დაინტერესებულმა პირებმა ყველაფერი გააკეთეს, რათა სხვადასხვა ადამიანები პასუხისგებაში არ მიცემულიყვნენ. ამას მოჰყვა ის, რომ საქმეზე სწორი გამოძიება არ ჩატარდა. დარწმუნებული ვარ, როცა სასამართლო ამ მტკიცებულებების ანალიზს მოახდენს, აუცილებლად დაცვის მხარის პოზიციას გაითვალისწინებს და არა ბრალდების მხარის უსაფუძვლო პოზიციას“, - აცხადებს კაკაბაძე.
მისი განმარტებით, კონკრეტულ პირებს სურთ დანაშაული მხოლოდ ორ პიროვნებას გადააბრალონ, დანარჩენი დამნაშავეები კი პასუხისგებაში მიცემული არ არიან.
„დაცვის მხარე პირველივე დღიდან ვაპელირებდით იმაზე, რომ არიან საქმით დაინტერესებული კონკრეტული პირები, რომელთაც ამ საქმეზე ობიექტური და სრულყოფილი გამოძიების წარმართვა არ სურთ. ბრალდების მხარე ჩემი დაცვის ქვეშ მყოფს უმძიმესი დანაშაულის ჩადენას ედავება, თუმცა, მას არცერთი მტკიცებულებით არ უდასტურდება იმ დანაშაულის ჩადენა, რასაც ბრალდების მხარე ედავება. დასტურდება, რომ სულ სხვა პირებმა ჩაიდინეს სავარაუდო დანაშაული, რომელთაც სავარაუდოდ, კონკრეტული პირების დაინტერესების შედეგად დააფარეს ხელი. სურთ, ერთ და ორ ადამიანს გადააბრალონ ის, რაც მრავალმა ადამიანმა ჩაიდინა. ეს ნამდვილად დაუშვებელია.
ასვე გამოვიკვლიეთ ბრალდებულის ტანსაცმელი, საიდანაც დადასტურდა ის, რაზეც დაცვის მხარე ვაპელირებთ. ტანსაცმელზე თუ რა ნივთიერება და სად იქნა აღმოჩენილი, ზუსტ შესაბამისობაშია დაცვის მხარის პოზიციასთან. მომხდართან დაკავშირებით, ბრალდებული სასამართლოს აუცილებლად მისცემს ჩვენებას და დეტალურ ინფორმაციას მიაწვდის თუ რა მოხდა, როგორ განვითარდა მოვლენები“, - აცხადებს ადვოკატი.
შემდეგი სასამართლო პროცესი 9 მაისს, 12:00 საათზე გაიმართება.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.
