მირზა სუბელიანმა იცოდა, სად იყო ბრალდებული, მაგრამ არ წარადგინა პოლიციაში, - განაცხადა ჟურნალისტებთან ხორავას ქუჩაზე მოკლული დავით სარალიძის მამამ, ზაზა სარალიძემ.
დღევანდელ სასამართლო სხდომაზე იმ ერთ-ერთი მთავარი მოწმის ძმა დაიკითხა, რომელმაც სასამართლოშიც და გამოძიების ეტაპზეც ჩვენება 5-ჯერ შეცვალა. დღეს დაკითხული მოწმე აღნიშნულ საქმეზე დანაშაულის შეუტყობინებლობაზეა ბრალდებული.
"ვფიქრობ, ლუკა კალანდია ამ პროცესისთვის ძალიან კარგად იყო მომზადებული, მას დაზეპირებული ჰქონდა ის ჩვენება, რომელიც უნდა მიეცა. ის მოამზადა ან პროკურატურამ, ან სუბელიანმა, ან ერთ-ერთი ბრალდებულის ახლობლებმა. ძირითადი, რაც მან ამოკვეთა და რაც მანამდე მამამისმა და მისმა ძმამ უარყვეს, არის მირზა სუბელიანის მათ სახლში ყოფნა. ლუკა კალანდიამ დაადასტურა, რომ მირზა სუბელიანი იყო მათთან სახლში 1 დეკემბერს მაშინ, როცა მისი ძმა და ერთ-ერთი ბრალდებული სახლში იმყოფებოდნენ. ანუ, მირზა სუბელიანმა იცოდა, სად იყო ბრალდებული, მაგრამ არ წარადგინა პოლიციაში", - აცხადებს სარალიძე.
მისი განმარტებით, ლუკა კალანდიას მიერ სასამართლოზე მიცემული ჩვენება, მისი ძმის ჩვენების იდენტური იყო. როგორც სარალიძე აღნიშნავს, მოწმე ცდილობდა თავისი ოჯახის და ძმის დაცვას, რომ არ გამოაშკარავებულიყო სხვადასხვა დეტალები. მან მამაზე, თენგიზ კალანდიაზე განხორციელებული შესაძლო ზეწოლა უარყო.
"ძმის მონაწილეობაზე ასეთი რამ თქვა: ეხებოდა დათოს და ჩემმა შვილმა გამოიყენა რაგბის ილეთი, ბეჭით დაეჯახა და გამოაგდო ჩხუბიდანო. ეს აჩენს საფუძვლიან ეჭვს, რომ ის ტანსაცმელი, რომელიც ჩხუბის დროს ეცვა მის ძმას არ არის წარდგენილი გამოძიებაში. თუ დათოს ეხებოდა მ.კ. მაშინ რატომ არ ამოვიდა მის ტანსაცმელზე სისხლი?! გამოდის რომ ტანსაცმელი გამოიცვალეს და ისე მივიდნენ პოლიციაში.
მორაგბეა კალანდია და მორაგბე იყო ჩემი შვილიც, თუ დაეტაკა, სისხლი ტანსაცმელზე აუცილებლად გადავიდოდა. მათ ტანსაცმელი გამოიცვალეს და ისე წარადგინეს საგამოძიებო უწყებაში", - დასძენს სარალიძე.
რაც შეეხება იმას, მიეცემა თუ არა, ყოფილი პროკურორი, მირზა სუბელიანი პასუხისგებაში,როგორც სარალიძე დასძენს, ამის მოლოდინი არ აქვს.
"სამწუხაროდ,სუბელიანის პასუხისმგებლობას არავინ დააყენებს. კარგად ხედავთ, რომ დღემდე ბევრი ადამიანის პასუხისგების საკითხი უნდა დამდგარიყო, მაგრამ ეს ასე არ მომხდარა", - აცხადებს დაზარალებული.
ცნობისთვის, პირველ დეკემბერს, ხორავას ქუჩაზე მოზარდებს შორის სისხლიან გარჩევას, ორი არასრულწლოვნის სიცოცხლე ემსხვერპლა.