ვფიქრობ რომ უფრო სწორი იქნება, თუკი პრეზიდენტის არჩევნები იქნება არაპირდაპირი, - ამის შესახებ კონსტიტუციონალისტმა ვახტანგ ხმალაძემ გადაცემა "პრიორიტეტებში" განაცხადა. მისი თქმით, საქართველო საპარლამენტო მმართველობის მქონე ქვეყანაა და უმჯობესი იქნება თუ პრეზიდენტსაც პარლამენტი აირჩევს. "გამომდინარე იქიდან, რომ მისი უფლებამოსილება შეზღუდულია და არ აქვს აღმასრულებელი ხელისუფლების მსგავსი ბერკეტები, იგი ნაკლებად ქმედითუნარიანია".
„პირდაპირ არჩეული პრეზიდენტისაგან, ამომრჩევლები, რომლებიც ნაკლებად არიან გარკვეულები პრეზიდენტის უფლებებში, მათ მიერვე არჩეულ პრეზიდენტს სთხოვენ ისეთი საკითხების გადაწყვეტას, რისი უფლებაც არ აქვს. ასევე, პირდაპირი წესით არჩეულ პრეზიდენტს უჩნდება ხოლმე ამბიცია. ეს მომხდარა არამხოლოდ ჩვენნაირი გარდამავალი დემოკრატიის მქონე ქვეყნებში, არამედ სხვა უფრო ძველი დემოკრატიის მქონეშიც. მათ უჩნდებათ სურვილი იყვნენ უფრო მეტნი, განაცხადონ და გააკეთონ უფრო მეტი, ვიდრე რეალურად აქვთ უფლებასმოსილება. ამას კი შეაქვს დაძაბულობა სახელმწიფო ინსტიტუტების საქმიანობაში. ყოველივე ამ მიზეზების გამო, ვფიქრობ რომ უფრო სწორი იქნება, თუკი პრეზიდენტის არჩევნები იქნება არაპირდაპირი“, - განაცხადა ხმალაძემ.
