რუსეთის კალუგის ოლქში, ქალაქ კალუგასა და რეგიონის რამდენიმე რაიონში, ღამით დრონებით თავდასხმა განხორციელდა. ოლქის გუბერნატორის, ვლადისლავ შაფშას განცხადებით, საჰაერო თავდაცვის სისტემებმა 13 დრონი გაანადგურეს.
მისი ინფორმაციით, დრონები ჟუკოვსკის, იზნოსკოვსკისა და მალოიაროსლავეცის მუნიციპალიტეტების ტერიტორიებზე, ასევე უშუალოდ კალუგის თავზე ჩამოაგდეს.
შეტევის შედეგად კალუგაში მრავალბინიანი და კერძო საცხოვრებელი სახლები დაზიანდა. ადგილზე ოპერატიული ჯგუფები მუშაობენ და ზარალის მასშტაბს ადგენენ.
წინასწარი ინფორმაციით, რამდენიმე ადამიანი დაშავდა.
კალუგის ოლქში დრონების საფრთხის რეჟიმი დაახლოებით 18 საათის განმავლობაში მოქმედებდა და 3 ოქტომბერს, 06:48-ზე გაუქმდა. ამ პერიოდში კალუგის აეროპორტშიც დაწესებული შეზღუდვები მოქმედებდა.
