საფრანგეთში მოსწავლეების საპროტესტო აქციები გრძელდება - აქციებმა და სკოლების ბლოკირებამ ქვეყნის მასშტაბით 700-ზე მეტი საგანმანათლებლო დაწესებულება მოიცვა. იუწყება Reuters
საფრანგეთის განათლების მინისტრ ედუარ გეფრაის განცხადებით, საპროტესტო მოძრაობამ 735 დაწესებულებას მოიცვა. მისი ინფორმაციით, არეულობის დროს სკოლების 65 თანამშრომელი დაშავდა, მათ შორის 40 სკოლის დირექტორი.
საფრანგეთის შინაგან საქმეთა მინისტრმა ლორან ნიუნესმა განაცხადა, რომ 2 ოქტომბერს აქციებთან დაკავშირებით 1 747 ადამიანი დააკავეს, რის შედეგადაც ორშაბათიდან დაკავებულთა საერთო რაოდენობამ 5 000-ს გადააჭარბა. მისი თქმით, პარასკევს საპროტესტო მოძრაობა 735 დაწესებულებას შეეხო, მათგან 158-ის მიმდებარედ კი ხელისუფლებამ „ქალაქის მასშტაბის ძალადობა“ დააფიქსირა. დაკავებულთა 85% არასრულწლოვანი იყო.
Reuters-ის ცნობით, საპროტესტო მოძრაობა, რომელიც თავდაპირველად პარიზის გარეუბნებში დაიწყო, ამ კვირაში 1 200-ზე მეტ სკოლაში გავრცელდა. მოსწავლეები აპროტესტებენ გადატვირთულ კლასებს, მასწავლებლების დეფიციტს და სკოლების ინფრასტრუქტურის პრობლემებს.
2 ოქტომბერს მოსწავლეთა ორგანიზაციების წარმომადგენლები განათლების მინისტრ ედუარ გეფრაის შეხვდნენ. შეხვედრის შემდეგ მათ განაცხადეს, რომ კონკრეტული ზომები არ მიუღიათ და საპროტესტო მოძრაობის გაგრძელებისკენ მოუწოდეს. მოსწავლეთა ორგანიზაციებმა მორიგი მასშტაბური მობილიზაცია 6 ოქტომბერს დააანონსეს. აქციას განათლების სფეროს რამდენიმე პროფკავშირიც შეუერთდება.
გეფრაიმ შეხვედრის შემდეგ განაცხადა, რომ ხელისუფლება იმუშავებს სკოლის ინფრასტრუქტურის, კლასებში მოსწავლეთა რაოდენობისა და სასწავლო განრიგის საკითხებზე. მან ასევე დააანონსა მასწავლებლების ჩანაცვლების დაჩქარების გეგმა, რომელიც მომდევნო კვირიდან უნდა ამოქმედდეს.
აქციების პარალელურად, რიგ ქალაქებში დემონსტრანტებსა და პოლიციას შორის შეტაკებები მოხდა. AFP-ის ინფორმაციით, პარასკევს რამდენიმე ქალაქში სტუდენტებმა ცეცხლი წაუკიდეს ნაგვის ურნებს და პოლიციას სხვადასხვა საგანი ესროლეს, რის საპასუხოდაც სამართალდამცველებმა ცრემლსადენი გაზი გამოიყენეს.
Reuters-ის ცნობით, საპროტესტო აქციების მონაწილეები აცხადებენ, რომ საფრანგეთის გარეუბნებში სკოლები განსაკუთრებით მძიმე მდგომარეობაშია და მათთვის განათლების რესურსები არასაკმარისია. აქციები პარიზის გარდა მარსელში, სტრასბურგში, ტურში, ლილსა და სხვა ქალაქებშიც გავრცელდა.
