7 თებერვალს, 11:00 სათზე, სასტუმრო „რუმსში“ სან დიეგოს სახელმწიფო უნივერსიტეტი (SDSU) საქართველოში ახალი საბაკალავრო პროგრამების პრეზენტაციას გამართავს. საერთაშორისო აკრედიტაციის მქონე სამშენებლო ინჟინერიისა და სამოქალაქო ინჟინერიის საბაკალავრო პროგრამებს SDSU საქართველოს დეკანი, დოქტორი კენ უოლში, სამშენებლო სექტორის წარმომადგენლებსა და მედიას წარუდგენს.
„შეხვედრის მიზანია, სამშენებლო სექტორის წარმომადგენლებს გავაცნოთ ახალი ამერიკული საბაკალავრო პროგრამები სამშენებლო ინჟინერიასა და სამოქალაქო ინჟინერიაში. ეს პროგრამები აშშ-ში სამშენებლო სექტორთან მჭიდრო თანამშრომლობით შეიქმნა, რათა კურიკულუმში გათვალისწინებული იყოს თანამედროვე ბაზრის მოთხოვნები. იგივე პრაქტიკა გვსურს დავნერგოთ საქართველოშიც. ეს პროფესიები დასაქმების ბაზარზე ძალიან მოთხოვნადია, ამიტომ სტუდენტების ინტერესი დიდია. მნიშვნელოვანია, კავშირი მომავალ დამსაქმებელსა და უნივერსიტეტს შორის თავიდანვე დამყარდეს, გავაცნოთ მათ ამ საგანმანათლებლო პროგრამების შესაძლებლობები, რითი განსხვავდება ისინი სხვა პროგრამებისგან და რა ცოდნის კურსდამთავრებულებთან ექნება საქმე დამსაქმებელს“, - განაცხადა დოქტორმა უოლშმა.
პრეზენტაციას დაესწრებიან ათასწლეულის გამოწვევის ფონდი - საქართველოს აღმასრულებელი დირექტორი მაგდა მაღრაძე, ათასწლეულის გამოწვევის კორპორაციის საქართველოს დირექტორი ჯენერ ედელმანი, საქართველოს ტექნიკური უნივერსიტეტის რექტორი არჩილ ფრანგიშვილი და „ანაკლია დეველოპმენტის“ ვიცე-პრეზიდენტი პოლ ფორსი. პრეზენტაციაზე მიწვეული არიან სამშენებლო სფეროს წარმომადგენლები როგორც კერძო, ისე საჯარო სექტორებიდან. პროგრამები არის საერთაშორისოდ აკრედიტებული და სტუდენტები იღებენ ამერიკულ დიპლომს.
ახალ პროგრამებთან ერთად, 2017 სასწავლო წელს სან დიეგოს სახელმწიფო უნივერსიტეტი სტუდენტებს სთავაზობს ამერიკულ საბაკალავრო პროგრამებს კომპიუტერულ მეცნიერებებში, კომპიუტერულ ინჟინერიაში, ელექტრულ ინჟინერიასა და ქიმია/ბიოქიმიაში. სტუდენტებს შესაძლებლობა ექნებათ, ერთი სემეტრით ან ერთი წლით სწავლა განაგრძონ SDSU-ს კალიფორნიის კამპუსში. პროგრამის პარტნიორები საქართველოში არიან: თბილისის სახელმწიფო უნივერსიტეტი, ილიას სახელმწიფო უნივერსიტეტი და საქართველოს ტექნიკური უნივერსიტეტი.
სანდიეგოსსახელმწიფოუნივერსიტეტი (SDSU) ასწლიანი ისტორიის მქონე ამერიკული უნივერსიტეტია. ის ერთ-ერთი უდიდესი და მოთხოვნადი უმაღლესი სასწავლებელია ამერიკის შეერთებულ შტატებში - 35,000 სტუდენტით და 120-მილიონდოლარიანი ბიუჯეტით კვლევითი საქმიანობისთვის. სან დიეგოს სახელმწიფო უნივერსიტეტი, ათასწლეულის გამოწვევის ფონდი - საქართველოს უმაღლესი განათლების კომპონენტის ფარგლებში, საქართველოში 2015 წლიდან ახორციელებს მაღალიხარისხის, საერთაშორისო აკრედიტაციის მქონე (ABET, ACS, WASC) საბაკალავრო პროგრამებს საინჟინრო და ტექნოლოგიურ (STEM) დარგებში. პროექტი ხორციელდება აშშ-ის ათასწლეულის გამოწვევის კორპორაციის (MCC) მეორე კომპაქტის ფინანსური მხარდაჭერით და მისი მიზანია საქართველოში STEM დარგების პროფესიონალთა ახალი თაობის აღზრდა და უმაღლესი საგანმანათლებლო სისტემის რეფორმირებაში წვლილის შეტანა.
