პირი რომელიც ” კრწანისის“ ტერიტორიაზე შეჭრის მცდელობისას იქნა ლიკვიდირებული, იდენტიფიცირებულია და ის 1993 წელს დაბადებული გიგა შენგელიაა. გიგა შენგელია ზუგდიდის რაიონის სოფელ ჯიხაშკსრის მკვიდრია. მისი ოჯახი ენგურქაღალდკომბინატის დასახლებაში ცხოვრობს.
გარდაცვლილის დედა ელზა შენგელია დარწმუნებულია, რომ მის შვილს იარაღი არ ექნებოდა.
„ქათმის დაკვლის რომ ეშინოდა, ისეთ კაცს რა იარაღი უნდა ჰქონოდა? ჩემს მეორე შვილს ველაპარაკე, ვიღაც გოგოსთან შესახვედრად წავიდაო და მალე დაგელაპარაკებაო, ნუ გეშინიაო. სამხედროში რა უნდოდა? - არანაირი ვერსია არ გვაქვს. ან ის გუშაგი ვინ იდგა? - ისე დაეჭირათ, ციხეში ჩაესვათ“, - განაცხადა ელზა შენგელიამ.
გარდაცვლილის ნათესავის ციცო ბასილაიას ინფორმაციით, კი გიგა შენგელიას ძმა კრწანისის ბაზაზე მსახურობდა. გარდაცვლილის ოჯახს გავრცელებული ვერსიის არ სჯერა და ალტერნატიული ექსპერტიზის ჩატარებას გეგმავს.
„უაღრესად პატიოსანი ბავშვი იყო, სხვა დამატებით არანაირი ინფორმაცია არ ვიცით. იარაღი არასდროს ჰქონია. „კრწანისში“ მისი ძმა მსახურობდა, რომელსაც დამთავრებული ჰქონდა. გავრცელებული ვერსიის არ გვჯერა და ვაპირებთ ალტერნატიული ექსპერტიზის ჩატარება“, - განაცხადა ციცო ბასილაიამ.
გავრცელებული ინფორმაციით, იმ ორი პირიდან, რომელმაც გუშაგის მიერ ცეცხლის გახსნის შემდეგ გაქცევა მოახერხა, ერთ-ერთი სწორედ გარდაცვლილი შენგელიას ძმაა.
