თუშეთის გზაზე, ე.წ. ცოდვიან ხევთან ზვავი ჩამოწვა, რის გამოც მაღალი გამავლობის ორი ავტომობილი გადაადგილებას ვეღარ ახერხებს. ორივე ავტომობილში სავარაუდოდ 4 ადამიანია, - ამის შესახებ ინფორმაციას კახეთის საინფორმაციო ცენტრი ავრცელებს.
ახმეტის მუნიციპალიტეტის გამგებლის წარმომადგენლის ლადო კახოიძის ინფორმაციით, გზის გაწმენდითი სამუშაოები მიმდინარეობს და მოძრაობა მალე აღდგება.
„ცოდვიან ხევთან ზვავი დღეს ჩამოვიდა. ორი მანქანა გზაშია დარჩენილი. ერთი თუშეთიდან მომავალი, მეორე კი თუშეთისკენ მიმავალი. ამ დროისთვის თუშეთიდან თითქმის ყველა წამოვიდა, ვინც იქ გამოზამთრებას არ აპირებს. დარჩენილი არიან მხოლოდ დართლოსა და თუშეთის დაცული ტერიტორიის ადმინისტრაციის შენობის რეაბილიტაციაზე დასაქმებული ადამიანები. რამდენიმე ავტომობილი დღეს შუადღეს აპირებს წამოსვლას. როგორც ვიცი, დღესვე სოფელ შენაქოდან საქონელიც უნდა წამოვიდეს. გზაზე გაწმენდითი სამუშაოები მიმდინარეობს და მალევე გაიხსნება“, - უთხრა კახეთის საინფორმაციო ცენტრს ლადო კახოიძემ.
ზვავი იყო ჩამოსული საავტომობილო გზის დაახლოებით მე-40 კილომეტრზეც, სადაც „კამაზის“ ტიპის ავტომობილი გადაადგილებას ვერ ახერხებდა.
„ის მონაკვეთი, სადაც კამაზი გადასვლას ვერ ახერხებს, აბანოს უღელტეხილის იქით, დაახლოებით მე-40 კილომეტრზე მდებარეობს, „ციმბირს“ ეძახიან. მზის დროს თოვლი რომ დნება, იქ ზვავი ჩამოდის. ამ მომენტში ეს მონაკვეთი გაწმენდილია“, - აღნიშნა ლადო კახოიძემ.
მისივე ინფორმაციით, ხვალიდან ამინდის გაუარესებაა მოსალოდნელი და შესაძლოა, თუშეთთან დამაკავშირებელი საავტომობილო გზა მაისის შუა რიცხვებამდე ჩაიკეტოს.
წელს თუშეთის სხვადასხვა სოფელში გამოსაზამთრებლად დაახლოებით 18 ოჯახი დარჩება. აბანოს უღელტეხილზე დიდთოვლობის გამო თუშეთთან დამაკავშირებელი ერთადერთი საავტომობილო გზა თითქმის 7 თვით იკეტება და თუშეთში წასვლა ან წამოსვლა მხოლოდ ვერტმფრენით არის შესაძლებელი.