გარემოსა და ბუნებრივი რესურსების დაცვის მინისტრმა გიგლა აგულაშვილმა, ხის დარგვის საერთაშორისო დღესთან დაკავშირებით, აღმასრულებელი ხელისუფლების, ბიზნესსექტორისა და დონორი ორგანიზაციების წარმომადგენლებს ეროვნულ საშენ მეურნეობაში უმასპინძლა.
ღონისძიების ფარგლებში, მეურნეობის მიმდებარე ტერიტორიაზე ქარსაფარი ხეივანი გაშენდა, სადაც ჯამში 250-მდე პირამიდალური ვერხვი, ჰიმალაის კედარი და ტუიას ხე-მცენარეები დაირგო. დარგვის აქციაში მონაწილეობა სოფლის მეურნეობისა და ენერგეტიკის მინისტრებმაც მიიღეს. აქციას სხვადასხვა უნივერსიტეტის სტუდენტები და მწვანე მოხალისეებიც შეუერთდნენ.
სოციალური პასუხისმგებლობის ამაღლებისა და საქართველოს წითელი ნუსხის სახეობის - ნაკადულის კალმახის საშენის მოწყობის მიზნით, მეურნეობაში აუქციონიც გაიმართა, სადაც კერძო სექტორის წარმომადგენლებმა იშვიათი ჯიშის სახეობები შეიძინეს.
2016 წლის იანვრიდან, მეურნეობის ფუნქციებს დაემატა - კომპეტენციის ფარგლებში ველური ფაუნის ადგილობრივ სახეობათა სადედე ეგზემპლარებისა და სხვა მოსაშენებელი მასალის მოპოვება, შეძენა და მოშენება, როგორც ბუნებრივ გარემოში გაშვების, ასევე რეალიზაციის მიზნით.
კაპიტალურად გარემონტდა ყოფილი საბოცვერეს შენობა, სადაც განთავსდა საწიწილე საზრდელი ოთახები, საინკუბატორო და საკვების საამქრო. მოეწყო ბუნებასთან ინტეგრირებული ვოლიერები. შემოყვანილია 80 ფრთა კაკაბი და კოლხური ხოხობის 8 ოჯახი.
სტუმრებმა ეროვნულ საშენ მეურნეობაში წითელი ნუსხისა და იშვიათი ჯიშის ხე-მცენარეთა პლანტაციები, გარეულ ფრინველთა ორნიტოფერმა, ხე-მცენარეთა საკონტეინერო ბაქანი და სარეზერვო ტბორი დაათვალიერეს.
ღონისძიებას მინისტრის მოადგილეებთან ერთად, სამინისტროს სტრუქტუული ერთეულების ხელმძღვანელებიც ესწრებოდნენ.
