თემქა-მუხიანის გასაყარზე მდებარე ნუშის ქუჩის მაცხოვრებლები უკვე მეორე კვირაა, დახმარებას ითხოვენ.
თვის დასაწყისში ქუჩაზე კანალიზაციის სისტემის გამოცვლა დასრულდა. გამგეობის მიერ დაფინანსებული პროექტი თითქმის ორი თვის განმავლობაში გრძელდებოდა. ამ დროის მანძილზე ადგილობრივებს ქუჩაზე ტრანსპორტით გადაადგილების პრობლემა მუდმივად ექმნებოდათ, თუმცა სამუშაოები აგვისტო-ოქტომბრის პერიოდში მიმდინარეობდა და პრობლემა იმდენად გაუსაძლისი არ ყოფილა. ამინდის გაუარესების შემდეგ კი ქუჩაზე არათუ ტრანსპორტით, ფეხით გადაადგილებაც შეუძლებელი გახდა.
განსაკუთრებით რთული ვითარებაა შექმნილი ნუშის ჩიხის მონაკვეთზე. გზა მთლიანად ტალახშია ჩაფლული. გრძივი თხრილი, რომელშიც ახალი კანალიზაციის მილები გაიყვანეს და მიწით გადაფარეს, რამდენიმე ადგილზე ჩავარდა. მოსახლეობამ ღრმულები რამდენჯერმე ამოავსო, თუმცა ტრანსპორტით გადაადგილებისას თხრილების ჩავარდნის რისკი დიდია.
ადგილობრივმა მცხოვრებლებმა დახმარებისთვის თბილისის მერიის ცხელ ხაზს მიმართეს, საიდანაც შემდეგი განმარტება მიიღეს: გზის საფარის დაგებამდე ქუჩაზე მიწისქვეშა კომუნიკაციებია გასაყვანი. ამჟამად გლდანი-ნაძალადევის გამგეობა მოლაპარაკებას GWP-სთან წყლის მილების გაყვანაზე აწარმოებს და ასფალტის დაგება მხოლოდ მას შემდეგ გახდება შესაძლებელი, რაც წყალგაყვანილობა მოწესრიგდება. შეთანხმება გამგეობასა და GWP-ს შორის ამ დრომდე არ შემდგარა. ჯერჯერობით აბონენტები არც ახლადგაყვანილ კანალიზაციის სისტემაზე მიუერთებიათ. ამ დრომდე გაურკვეველია, გათვალისწინებულია თუ არა წლევანდელ ბიუჯეტში წყალგაყვანილობის მოწესრიგებისა და გზის კეთილმოწყობის ხარჯები. კითხვაზე, თუ რამდენ ხანს მოუწევთ ტალახში ცხოვრება, ადგილობრივებს მერიის ცხელი ხაზი პასუხობს, რომ ტალახში ყოფნა მათ არა გადათხრილი გზების, არამედ წვიმის გამო უწევთ.
ნუშისა და მისი პარალელური ავშნის ქუჩა გამგეობის მიერ წლების განმავლობაში იყო მიტოვებული. ახლადდასახლებული ქუჩის ბინადრებს მუდმივად ექმნებოდათ სასმელი წლის, კანალიზაციისა და მოუწესრიგებელი გზის პრობლება. მოსახლეობა კომუნალური პრობლემების მოგვარებას წლების მანძილზე დამოუკიდებლად ცდილობდა. მრავალგზის იგნორირების შემდეგ მათ სასმელი წყლის მილი ქუჩაზე საკუთარი ხარჯებით გაიყვანეს, რის შემდეგაც GWP-მა ისინი აბონენტებად აიყვანა და წლის გადასახადი სულადობით დაუწესა, მოგვიანებით კი რეგულაცია შეიცვალა და ახალ აბონენტებს მრიცხველების დადგმა დაავალდებულეს. მოსახლეობა საკუთარი ხარჯით ცდილობა გზის დაზიანებული მონაკვეთების შეკეთებასაც. მაგალითისთვის, ნუშის ჩიხის მცხოვრებლებს სავალი ნაწილის გაწმენდა-მოპირკეთება სოლიდური თანხა დაუჯდათ, თუმცა დღეს ტალახი კვლავ მათი ცხოვრების განუყოფელი ატრიბუტია.
იმ შემთხვევაში, თუ მათი მოთხოვნები არ დაკმაყოფილდება, ნუშის ქუჩის მცხოვრებლები პერმამენტული აქციებით იმუქრებიან.
