საქართველოს საკონსტიტუციო სასამართლოს თავმჯდომარის ვინაობა სავარაუდოდ დღეს გახდება ცნობილი. პლენუმის სხდომა საკონსტიტუციო სასამართლოში 16:00 საათზეა ჩანიშნული. შემადგენლობამ, რომელიც ამეტაპზე 8 მოსამართლით არის დაკომპლექტებული, ირინა იმერლიშვილსა და ზაზა თავაძეს შორის უნდა გააკეთოს არჩევანი. იმ შემთხვევაში, თუ ხმები თანაბრად გადანაწილდა, არჩევნები ხელახლა დაინიშნება, მაგრამ დღეს წარმოდგენილ კანდიდატებს არჩევნებში ხელმეორედ მონაწილეობა აღარ შეეძლებათ. საკონსტიტუციო სასამართლოს თავმჯდომარეს პლენუმის მინიმუმ 5 წევრი 5 წლის ვადით ირჩევს, თუმცა ზაზა თავაძის არჩევის შემთხვევაში იგი მხოლოდ 4 წლით უხელმძღვანელებს საკონსტიტუციო სასამართლოს, რადგანაც მოსამართლეობის უფლებამოსილების ამოწურვამდე მას 4 წელზე ნაკლები დარჩა.
