სოფლის მეურნეობის სამინისტროს სსიპ სურსათის ეროვნულ სააგენტოში დასავლეთ საქართველოში გავრცელებული მავნებლის “კუსებრი ფაროსანას“ საწინააღმდეგო ღონისძიებების შესახებ სპეციალურად შექმნილი სამუშაო ჯგუფის ფორმატში იმსჯელეს. შეხვედრას სურსათის ეროვნული სააგენტოს უფროსი ზურაბ ჩეკურაშვილი ხელმძღვანელობდა. აღინიშნა, რომ ქართველი და უცხოელი სპეციალისტების ჩართულობით კომპლექსური ღონისძიებები განხორციელდება. მავნებელთან ეფექტიანი ბრძოლის მიზნით გაიზიარებენ სხვა ქვეყნების გამოცდილებას და მოიწვევენ უცხოელ სპეციალისტებს. აღნიშნულ საკითხზე სურსათის ეროვნულ სააგენტოში შეხვედრები სისტემატურად გაიმართება.
კუსებრი ფაროსანა 100-მდე სასოფლო-სამეურნეო კულტურას, მათ შორის, თხილს და სიმინდს აზიანებს. მავნებელი გავრცელებულია როგორც მეზობელ, ასევე ევროპის რამდენიმე ქვეყანასა და აშშ-ში.
სურსათის ეროვნულ სააგენტოში გამართულ შეხვედრას მცენარეთა დაცვის სპეციალისტებთან ერთად აშშ-ის საერთაშორისო განვითარების სააგენტოს (USAID), საქართველოს თხილის სექტორის განვითარების პროექტის (G-HIP) ხელმძღვანელი, საქართველოს თხილის მწარმოებელთა ასოციაციისა და კომპანია “აგრიჯორჯიას“ წარმომადგენლები ესწრებოდნენ.