რუსეთის ეკონომიკის სამინისტრო წელს ბუნებრივი აირის მოპოვებისა და ექსპორტის უფრო დაბალ მაჩვენებლებს ელოდება, ვიდრე ადრე პროგნოზირებდა. ამის შესახებ Reuters რუსეთის მთავრობის დოკუმენტის პროექტზე დაყრდნობით წერს.

დოკუმენტის მიხედვით, 2026 წელს რუსეთში ბუნებრივი აირის მოპოვება 683.1 მილიარდ კუბურ მეტრს შეადგენს, რაც მაისის პროგნოზზე 5.3 მილიარდი კუბური მეტრით ნაკლებია. მიუხედავად შემცირებისა, ეს მაჩვენებელი 2025 წლის 662.7 მილიარდ კუბურ მეტრზე მეტია.

ამასთან, რუსეთიდან საზღვაო გზით თხევადი ბუნებრივი აირის (LNG) ექსპორტი წელს 35 მილიონ ტონამდე გაიზრდება, 2025 წლის 30.3 მილიონ ტონასთან შედარებით. თუმცა ესეც 5.3 მილიონი ტონით ნაკლებია, ვიდრე მაისში იყო ნავარაუდევი.

Reuters-ის ცნობით, რუსეთის გაზის მოპოვებისა და ექსპორტის პროგნოზების გადახედვა დასავლეთთან ეკონომიკური და პოლიტიკური კავშირების გაწყვეტისა და ევროკავშირის გეგმის ფონზე მოხდა, რომლის მიხედვითაც ბლოკი მომავალი წლიდან რუსული გაზის შესყიდვების სრულად შეწყვეტას გეგმავს.

სააგენტოს ინფორმაციით, რუსეთმა ასევე შეამცირა 2026 წლის ნავთობის მოპოვების პროგნოზი 17 წლის მინიმუმამდე და უკრაინის ომის ფონზე გადახედა საწვავის ექსპორტის პროგნოზებს მიმდინარე და მომდევნო წლისთვის.

ევროპაში რუსული მილსადენის გაზის ექსპორტმა გასულ წელს 44%-ით იკლო და 18 მილიარდ კუბურ მეტრამდე შემცირდა - ეს 1970-იანი წლების შუა პერიოდის შემდეგ ყველაზე დაბალი მაჩვენებელი იყო, Reuters-ის გამოთვლებით. შედარებისთვის, 2018–2019 წლებში რუსული მილსადენის გაზის ექსპორტი ევროპაში დაახლოებით 180 მილიარდ კუბურ მეტრს აღწევდა.