,,ირაკლი ალასანია - თავისუფალი დემოკრატების“ გლდანის მაჟორიტარი დეპუტატობის კანდიდატმა ამირან გიგუაშვილმა გლდანის მოსახლეობასთან ერთად საპროტესტო აქცია გამართა. აქციაზე გააპროტესტეს გლდანის მე-5 მ/რნში, დავით ჯაბიძის ქუჩაზე მიმდინარე მშენებლობა, რომელსაც გლდანელები წლებია წინააღმდეგობას უწევენ. ის რაც წინა ორმა ხელისუფლებამ ვერ შეძლო ნარმანიამ მოახერხა და მშენებლობა უკვე დაწყებულია.
აღნიშნულ ტერიტორიაზე წლების განმავლობაში იყო მწვანე ზონა, რომელსაც ადგილობრივი მოსახლეობა იყენებდა როგორც დასასვენებელ პარკს. უბნის მაცხოვრებლებმა არაერთხელ მიმართეს, როგორც შევარდნაძის, ისე ნაციონალური მოძრაობის და ოცნების მთავრობას ტერიტორიის კეთილმოწყობის შესახებ, თუმცა უშედეგოდ.
პერიოდულად ამ ტერიტორიაზე ყველა მთავრობის დროს იყო საცხოვრებელი კორპუსის მშენებლობის მცდელობა, თუმცა ეს ვერც ერთმა მთავრობამ დღემდე ვერ გაბედა.
სულ რამდენიმე თვის წინ, აღნიშნული ტერიტორია შემოიღობა და გაჩნდა სამშენებლო უბანი, სადაც სამშენებლო კომპანია ახორციელებს მრავალსართულიანი საცხოვრებელი კორპუსის მშენებლობას.
აქციის მონაწილეებმა გლდანის ამავე უბნის მაჟორიტარი დეპუტატობის კანდიდატ ამირან გიგუაშვილთან ერთად გააპროტესტეს მშენებლობა. აქვე ამირან გიგუაშვილმა წარადგინა მიმართვა და ხელმოწერები თბილისის მერის სახელზე, ასევე მერიას მიეცა ვადა იმისათვის, რომ არაუგვიანეს 10 დღისა მიღებული იქნეს მოსახლეობის ინტერესებიდან გამომდინარე გადაწყვეტილება.
,,ჩვენ მოვამზადეთ მიმართვა თბილისის მერის სახელზე, რომ შეჩერდეს მშენებლობა და ტერიტორიაზე განთავსდეს დასასვენებელი სკვერი. განცხადებას ხელს აწერს 110 ადგილობრივი მაცხოვრებელი“,-განაცხადა ამირან გიგუაშვილმა.
დაანონსდა, რომ აქცია არის გამაფრთხილებელი სახის.
საკითხს აქტუალობას სძენს ისიც, რომ ადგილობრივი მოსახლეობის ინფორმაციით მშენებლობის უკან დგას დავით ნარმანიას ძმის ირაკლი ნარმანიას ინტერესები, რასთან დაკავშირებითაც აქციაზე ერთ-ერთმა ადგილობრივმა მოსახლე ქალბატონმა ისაუბრა.
,, - ის რაც აქ ხდება არის დანაშაული გლდანელების წინაშე. ოცნებამ გაბედა ის, რაც ვერც შევარდნაძის კორუმპირებულმა მთავრობამ და ვერც ნაციონალურმა ხელისუფლებამ ვერ გაბედა. დავით ნარმანიამ ასეულობით ოჯახს წაართვა მწვანე ზონა და სკვერის მოწყობის ნაცვლად კიდევ ერთი მრავალსართულიანი კორპუსის მშენებლობის ნებართვა გასცა. მე ხელში მიჭირავს ადგილობრივი მაცხოვრებლების მიმართვა ქალაქის მერის სახელზე, რომლითაც ითხოვენ მშენებლობის შეჩერებას. ეს არის კლანურ-მაფიოზური გარიგება და არსებობს ეჭვი, რომ ამ სამშენებლო კომპანიის უკან ნარმანიას ძმის, ირკალი ნარმანიას ინტერესები დგას, ამიტომაც ქალაქის მერმა ყველაფერი უნდა გააკეთოს რომ ეს მშენებლობა შეჩერდეს და დაიწყოს მოლაპარაკება ადგილობრივ მოსახლეობასთან. ვაფრთხილებ დავით ნარმანიას, რომ თუ ათი დღის ვადაში ამ მაფიოზებს, რომლებმაც თავხედურად დაიწყეს აქ კორპუსის მშენებლობა არ გააჩერებს, მე პირადად, ჩემი საკუთარი ხელით, გლდანის მაცხოვრებლებთან ერთად, დავიწყებ სამშენებლო ღობის დემონტაჟს. დემონსტრაციულად ხელში მიჭირავს ძალაყინი და ვნახოთ ვის უფრო მეტი ძალა აქვს, ძალაყინს და ხალხის პროტესტს, თუ ხელისუფლებასთან დაკავშირებულ კლანურ-მაფიოზურ დაჯგუფებას“,-განაცხადა ამირან გიგუაშვილმა.