დღეს კომუნიკაციების ეროვნულმა კომისიამ დააკმაყოფილა საია-ს საჩივარი და ტელეკომპანია ,,მაესტრო“-ს დაავალა საია-ს მომზადებული სოციალური რეკლამის ეთერში განთავსება.
საია-ს მომზადებული სოციალური რეკლამა ადრეულ ასაკში ქორწინების უარყოფითი მხარეების შესახებ საზოგადოებრივი ცნობიერების ამაღლებას ისახავს მიზნად. ,,მაესტრომ“ რეკლამის განთავსების ოფიციალურ მიზეზად ,,მაესტრო“-სა და ,,საქართველოს ახალგაზრდა იურისტთა ასოციაციას“-ს შორის „ბოლო დროს განვითარებული მოვლენები“ დაასახელა. სავარაუდოდ, ,,მაესტრო“ ბოლო დროს განვითარებულ მოვლენებში გულისხმობდა იმ ფაქტს, რომ საია მწვავედ გამოეხმაურა ,,მაესტროს“ 32 თანამშრომლისათვის შრომითი ურთიერთობების დაუსაბუთებლად შეჩერების ფაქტს. საია-ს საჩივრის განხილვისას ,,მაესტროს“ წარმომადგენელმა განმარტა, რომ ,,მაესტრო“ უარს რეკლამის განთავსებაზე იმიტომ ამბობდა, რომ ვიდეო რგოლი არ წარმოადგენდა სოციალურ რეკლამას.
კომისიამ დაადგინა, რომ საია-ს მომზადებული ვიდეო რგოლი აკმაყოფილებდა სოციალური რეკლამისათვის კანონით დადგენილ მოთხოვნებს; ,,მაესტრომ“ დაარღვია კანონი, როდესაც უარი განაცხადა რეკლამის ეთერში განთავსებაზე და დაავალა ,,მაესტროს“ უზრუნველყოს რეკლამის ეთერში გაშვება. კომისიამ ასევე განუმარტა ,,მაესტროს“ სოციალური რეკლამის განთავსების ვალდებულება და წესი.