„ნაციონალური მოძრაობის“ სიის პირველი ნომერი აჭარაში ლევან ვარშალომიძე სახელმწიფო აუდიტის სამსახურში იკითხება. აჭარის მთავრობის ყოფილმა თავმჯდომარემ უწყებაში შესვლამდე ჟურნალისტებტან განაცხადა, რომ მისი დაბარების მიზეზი არის პროგრამა „სოციალური სახლი“, რომელიც ეხება სამი კატეგორიის სახლებს. ,,ეს არის ავარიული სახლები, მეწყერსაშიში ზონიდან ხალხის ჩამოყვანა და ე.წ. „ოცნების“ ქალაქები, რომლებიც აჭარაში ბოლო 4 წლის განმავლობაში შეიქმნა. პროგრამა ითვალისწინებს ამ კატეგორიის ხალხისთვის ბინების გადაცემას. მოლოდინია ის, რომ ჩვენ ამ სახლებს მაინც ავაშენებთ“, - განაცხადა ლევან ვარშალომიძემ.
ლევან ვარშალომიძე მოქალაქეებთან ინდივიდუალურ ხელშეკრულებებს აფორმებს და გამარჯვების შემთხვევაში მათ ბინის აშენებას ჰპირდება. არასამთავრობო ორგანიზაციები აღნიშნულ ფაქტს ამომრჩევლის მოსყიდვის მცდელობად აფასებენ.
აუდიტის სამსახურში ლევან ვარშალომიძის მოსვლას აქციის მონაწილეები ტაშითა და ოვაციებით შეხვდნენ. ისინი მიიჩნევენ, რომ დაპირებები არის საარჩევნო კამპანიის განუყოფელი ნაწილი და ის ამომრჩევლის მოსყიდვად არ შეიძლება შეფასდეს.
