ევროკავშირისა და გაერო-ს განვითარების პროგრამის მხარდაჭერით მიმდინარე, 2016 წლის საპარლამენტო არჩევნების მედიამონიტორინგის პირველი შედეგების თანახმად, 2012 წლის საპარლამენტო არჩევნების პერიოდთან შედარებით, მედიის მიერ წინასაარჩევნო პროცესების გაშუქებაში პროგრესი შეიმჩნევა.
კვლევის თახმად, ყველაზე მეტი დრო ეთმობა მთავრობის გაშუქებას, შედარებით ნაკლები - პრეზიდენტს. ასევე, „მთავრობა ძირითადად უარყოფითად ჰყავს წარმოჩენილი „რუსთავი 2“-ს და „ობიექტივს“, დადებითად - GDS-ს“.
რაც შეეხება პრესას და ონლაინ მედიას, სამოქალაქო განვითარების ინსტიტუტის წარმომადგენელი გიორგი ჯოლოგუა აცხადებს, რომ პრესის შემთხვევაში ძირითად გამოწვევას წარმოადგენს ჟურნალისტური ეთიკის ქარტიის ნორმებისა და ჟურნალისტური ეთიკის სტანდარტების, ზოგ შემთხვევაში, საკმაოდ უხეში დარღვევა.
„რამდენიმე გაზეთში გვხვდება, რომ ჟურნალისტები ან ღიად მხარს უჭერენ, ან ღიად ეწინააღმდეგებიან ამა თუ იმ პოლიტიკურ ძალას, თუმცა არის გაზეთები, რომლებიც აბსოლუტურად ობიექტურად აშუქებენ ქვეყანაში მიმდინარე პოლიტიკურ პროცესებს.
რაც შეეხება ონლაინ მედიას, ჟურნალისტური ეთიკის ნორმების დაცვის კუთხით საკმაოდ კარგი სურათი გვაქვს, ბევრად უკეთესი, ვიდრე პრესაში“, - განაცხადა გიორგი ჯოლოგუამ.
კვლევა დადებითად აფასებს რადიომაუწყებლების მუშაობასაც, რაც ქმნის კარგ წინაპირობას იმისთვის, რომ მათ ხელი შუეწყონ ამომრჩევლის ინფორმირებულობას,
„საქართველოს ჟურნალისტიკის ეთიკის ქარტიამ, „ინტერნიუს - საქართველომ“ და სამოქალაქო განვითარების ინსტიტუტმა (CDI) - საარჩევნო მედიამონიტორინგის პირველი ანგარიში დღეს გამოაქვეყნეს.
