სურსათის ეროვნულ სააგენტოში „სამოქალაქო დარბაზის“ მორიგი სხდომა გაიმართა. უწყების ინფორმაციით, სხდომაზე არასამთავრობო სექტორის ინიციატივით დასმული, ბიზნესოპერატორებისთვის და მომხმარებლისთვის აქტუალური საკითხები განიხილეს.
„მისასალმებელია სამოქალაქო სექტორის დაინტერესება იმ ღონისძიებებით, რომლებსაც სურსათის ეროვნული სააგენტო ახორციელებს. ევროკავშირთან დაახლოების მიზნით მნიშვნელოვანია სურსათის უვნებლობის მდგრადი სისტემის შექმნა და ცხოველთა ჯანმრთელობის უზრუნველყოფა. ჩვენ მზად ვართ, ვისაუბროთ იმ საკითხებზე, რომლებიც საზოგადოებას აინტერესებს“, - განაცხადა სურსათის ეროვნული სააგენტოს უფროსმა ზურაბ ჩეკურაშვილმა.
სააგენტოს წარმომადგენლებმა სამოქალაქო სექტორს HACCP-ის (საფრთხის ანალიზისა და კრიტიკული საკონტროლო წერტილების სისტემა ცხოველთა სასაკლაოებისა და ნედლი რძის გადამამუშავებელი საწარმოებისთვის) დანერგვის მიმდინარეობა, ბიზნესოპერატორთა აღიარების მინიჭების მიზნით გატარებული ღონისძიებები და არსებული ვითარება გააცნეს; ასევე მიაწოდეს ინფორმაცია ცხოველთა იდენტიფიკაცია-რეგისტრაციისა და ბრუცელოზთან ბრძოლის საწინააღმდეგო ღონისძიებების შესახებ.
დღეისათვის ბრუცელოზზე კვლევის მიზნით აღებულია 245 ათასი მსხვილფეხა პირუტყვის სისხლის ნიმუში. სერომონიტორინგი მთელი ქვეყნის მასშტაბით მიმდინარეობს. უახლოეს მომავალში დაიწყება ბრუცელოზის საწინააღმდეგო ვაქცინაცია, რაც ბრუცელოზთან ბრძოლის გრძელვადიანი სტრატეგიის ნაწილია; გრძელდება მსხვილფეხა და წვრილფეხა საქონლის იდენტიფიკაცია. დღეის მდგომარეობით, იდენტიფიცირებულია 2 მილიონზე მეტი ცხოველი (1 908 975 მსხვილფეხა და 134 348 წვრილფეხა პირუტყვი), რაც მნიშვნელოვანია ცხოველთა ჯანმრთელობის დასაცავად, დაავადებების პრევენციისა და ცხოველური წარმოშობის სურსათის მიკვლევადობისათვის.
სურსათის ეროვნულ სააგენტოსთან არსებული საკონსულტაციო საბჭო - „სამოქალაქო დარბაზი“ 2013 წლის დეკემბერში შეიქმნა. „სამოქალაქო დარბაზში“ გაერთიანებული არიან მეცნიერები, ექსპერტები და არასამთავრობო სექტორის წარმომადგენლები.