ახალგაზრდა იურისტთა ასოციაციამ "დაზარალებულთა უფლებები სისხლის სამართლის პროცესში" - კვლევის პრეზენტაცია გამართა.
საია-ში მიიჩნევენ, რომ კვლევის მიზანია, მიმოიხილოს დაზარალებულის უფლებრივი მდგომარეობა სისხლის სამართლის პროცესში, გააანალიზოს ხარვეზები და გამოწვევები კონკრეტული მაგალითებისა და სტატისტიკის საფუძველზე.
კვლევაში აღნიშნულია, რომ 2014 წელს სისხლის სამართლის საპროცესო კოდექსში განხორციელდა დადებითი ცვლილებები დაზარალებულის უფლებრივი მდგომარეობის გასაუმჯობესებლად, თუმცა ეს ცვლილებები არ აღმოჩნდა საკმარისი. კვლევეაი ასევე წერია, რომ არსებობს პრაქტიკული პრობლემებიც, მაგალითად, ცალკეულ შემთხვევებში პროკურატურა სრულიად დაუსაბუთებლად ეუბნება უარს დაზარალებულის პროცესუალური სტატუსის მინიჭებაზე იმ პირებს, რომლებსაც დანაშაულის შედეგად ზიანი მიადგათ. ასევე, ზოგჯერ დაზარალებულის სტატუსის მინიჭების მიუხედავად, პროკურატურა უარს ეუბნება მათ სისხლის სამართლის საქმის მასალების გაცნობაზე, რაც სათანადოდ არ არის დასაბუთებული.
"შესწავლილი 27 საპროცესო შეთანხმებიდან მოსამართლემ უმრავლეს შემთხვევაში, 21 გადაწყვეტილებაში, მათ შორის, ცემისა და ჯანმრთელობის ნაკლებად მძიმე დაზიანების საქმეებზე უგულებელყო დაზარალებულის ინტერესები", - წერია კვლევაში.
საია-ში ამბობენ, რომ მათ იმედი აქვთ, რომ შემუშავებულ რეკომენდაციებსა და გაკეთებულ დასკვნებს გაიზიარებენ როგორც საკანონმდებლო უწყებაში, ისე პროკურატურასა და სასამართლო სისტემაში.