„ქართული ოცნება-დემოკრატიული საქართველოს“ აღმასრულებელი მდივანი ირაკლი კობახიძე პრეზიდენტის გაკეთებულ განცხადებას ეხმაურება, რომელიც მმართველ გუნდში”მოძველბიჭო” ჯგუფების არსებობას ეხებოდა, მისი თქმით, გიორგი მარგველაშვილი ამ გუნდის დახმარებით გახდა საქართველოს პრეზიდენტი და მან ზუსტად იცის ,,ძველი ბიჭები“ არიან წარმოდგენილები პარტიაში თუ არა.
„პრეზიდენტის ეს განცხადება არ არის სამართლიანი და არ არის ობიექტური. პრეზიდენტმა კარგად იცის, თუ ვის აერთიანებს ჩვენი გუნდი. აქედან გამომდინარე, კიდევ ერთხელ გავიმეორებ, რომ ეს განცხადება არის არასამართლიანი და არ არის კორექტული“, - აცხადებს კობახიძე.
კობახიძე კორცხელის დაპირისპირების საკითხსაც გამოეხმაურა და განაცხადა, რომ ამასთან დაკავშირებით მთელმა გუნდმა, მათ შორის პარტიის ხელმძღვანელობამ, ძალიან მკაფიო განცხადება გააკეთა.
„ჩვენთვის მიუღებელია ის, რაც მოხდა კორცხელში და ყველაფერს გავაკეთებთ იმისთვის, რომ ასეთი რამ თავიდან ავირიდოთ ოქტომბრის არჩევნებში. აქედან გამომდინარე, ზედმეტია საუბარი იმაზე, რომ საქმე გვქონდა დაგეგმილ აქტთან“,-განმარტა კობახიძემ.
იგი კახა კალაძესთან, დაკავშირებით ”ნაციონალური მოძრაობის” მიერი გამოთქმულ ბრალდებებსაც გამოეხმაურა და აღნიშნა, რომ ენმ-ის მხრიდან საუბარი კახა კალაძეზე, ,,რბილად რომ ვთქვათ, არაკორექტულია იმ ყველაფრის შემდეგ, რაც მათ უშუალოდ კახა კალაძესთან მიმართებაში გააკეთეს. გახსოვთ თქვენ, რა ხდებოდა 2012 წელს. ეს არის, რბილად რომ ვთქვათ, თავხედობა ”ნაციონალური მოძრაობის“ მხრიდან“, - განაცხადა ირაკლი კობახიძემ.
