პარლამენტის ვიცე-სპიკერი მანანა კობახიძე არ გამორიცხავს, რომ თამაზ მეჭიაური პოლიტიკური გუნდის შეცვლაზე ფიქრობდეს. გადაცემა 2030-ში კობახიძემ ასევე განაცხადა, რომ მეჭიაურის განცხადებები გაგებულ უნდა იქნას ერთი დეპუტატის ინდივიდუალურ პოზიციად და არა ხელისუფლების პოზიციად,
“თუ შენი პირადი მოსაზრებები გუნდის ოფიციალურად გაცხადებული პოლიტიკური პლატფორმისგან რადიკალურად განსხვავდება, ლოგიკურია, ამ გუნდს გაემიჯნო. არ შეიძლება, გაურკვევლობა დიდხანს გაგრძელდეს. ამ საკითხს პარტია საკუთარ წევრებთან გაარკვევს და ამისთვის სხვა, პარტნიორი, თუ კონკურენტი პარტიების მითითებები ნამდვილად არ გვჭირდება”, - განაცხადა კობახიძემ.
მან “ქართული ოცნების” საარჩევნო სიასთან დაკავშირებითაც ისაუბრა.
“ინტენსიურად ვმუშაობთ, რომ სია მაქსიმალურად დახვეწილი და კონკურენტუნარიანი იყოს. 4 თვით ადრე, თავისი სიის შემადგენლობას არც ერთი პარტია არ აკონკრეტებს. ვადასტურებ, რომ საარჩევნო სიაში ყოფნასთან დაკავშირებით ჩემთან შემოთავაზება იყო, მაგრამ საბოლოო გადაწყვეტილებას პარტია მიიღებს.”, - განაცხადა მანანა კობახიძემ.
