თბილისის მერის დავით ნარმანიას განცხადებით, მისი საკრებულოში მისვლის მოთხოვნის მიზნით, საჭირო ხელმოწერების შეგროვების შემთხვევაში, დედაქალაქის საკრებულოში აუცილებლად მივა. ,,იმედის“ ეთერში მან განაცხადა, რომ საკრებულოში მივა ასევე, უმრავლესობის მოთხოვნის შემთხვევაშიც.
„როდესაც საუბარია პოლიტიკურ შოუზე და იმ პოლიტიკური ოპონენტების მხრიდან მოწვევაზე, რომლებიც ურცხვად ატყუებენ ამომრჩევლებს, მე არ ვფიქრობ, რომ ეს ის ფორმატია, სადაც უნდა მივიდე. ამიტომაც, თუ კანონმდებლობით დადგენილი წესით იქნება საჭირო ხელმოწერები მოგროვებული, ან უმრავლესობის მხრიდან იქნება მოთხოვნა, იმასთან დაკავშირებით, რომ მივიდე საკრებულოში, რასაკვირველია, მივალ“, - განაცხადა ნარმანიამ.
მისივე თქმით, ოპონენტების მიერ დასმულ კითხვებს საკმაოდ საინტერესო პასუხები გაეცა. ამის მაგალითად ნარმანიამ პარლამენტში 4-საათიანი განხილვა დაასახელა.
,,ჩემი მოადგილე, რამდენიმე სამსახურის ხელმძღვანელი ესწრებოდა ამ საკითხს და ყველა კითხვაზე ამომწურავი პასუხი იქნა გაცემული. კიდევ ერთხელ ვიმეორებ, რაც უფრო ახლოვდება არჩევნები პოლიტიკურ ტემპერატურას ხელოვნურად სწევენ და ცდილობენ ამომრჩეველი გადმოიბირონ, ასე ვთქვათ, „სიცრუის დიდი მანქანის“ გამოყენებით, არ მინდა, რომ ვიყო ამის მონაწილე. ეს ჩემი გადასაწყვეტია“, - აღნიშნა ნარმანიამ.
მან გასულ დღეებში განაცხადა, რომ თბილისის საკრებულოში წესის შესაბამისად დეკემბერში აპირებს მისვლას. საკრებულოს ოპოზიციური პარტიების წარმომადგენლები შეეცდებიან მერის მისვლის მოთხოვნისთვის საჭირო 17 ხელმოწერის შეგროვებას.
