,,ალექსი ბატიაშვილის დღევანდელი ჩვენება იყო ბოლო ლურსმანი პროკურატურის საქმეში” , - ამის შესახებ "თავისუფალი დემოკრატების" ლიდერმა, ირაკლი ალასანიამ ყოფილი მოადგილის მიერ სასამართლოსთვის მიცემულ ჩვენებასთან დაკავშირებით განაცხადა.
"პროკურატურა დღევანდელ პროცესზე "დელტაკომის" ადვოკატივით იქცეოდა. დარწმუნებული ვარ, რომ სასამართლო შეაფასებს და დადასტურდება, რომ 5 ადამიანი, რომელსაც ამ საქმეში ბრალი აქვს წარდგენილი აბსოლუტურად უდანაშაულოა", - განაცხადა ირაკლი ალასანიამ.
იგი გამოეხმაურა ე.წ. კაბელების საქმიდან გამოყოფილ საქმეზე მიმდინარე გამოძიებასაც.,
"არ მგონია ცალკე გამოყოფილ საქმეს პერსპექტივა ჰქონდეს. პროკურატურის ქმედებები აბსოლუტურად იდენტურია რაც იყო ადეიშვილისა და სააკაშვილის დროს. მიმდინარე გამოძიება უპერსპექტივოა, თუმცა არ არის გამორიცხული პოლიტიკური ზეწოლისთვის გამოიყენონ ისევე, როგორც 5 უდანაშაულო ადამიანი უკანონოდ ამყოფეს 1 წლის განმავლობაში პატიმრობაში", - განაცხადა ირაკლი ალასანიამ.
ალექსი ბატიაშვილის ინფორმაციით, იგივე მომსახურებაში, რომელშიც "სილქნეტი" თავდაცვის სამინისტროს 1000 ლარს სთხოვდა, შსს "დელტაკომს" 350 000 ლარს უხდიდა. ამის შესახებ ე.წ. კაბელების საქმეზე მოწმემ, დღევანდელი დაკითხვისას განაცხადა.
,,"დელტაკომი" იგივე მომსახურებას, რომელსაც "სილქნეტი" უწევს თავდაცვის სამინისტროს ახორციელებს შს საქმეთა სამინისტროსთვის და თვეში ამისთვის იღებდა 350 000 ლარს. თავდაცვის სამინისტროს კი, "სილქნეტი" სთხოვდა 1000 ლარს სიმბოლურად”, - აღნიშნა ბატიაშვილმა.
შს სამინისტროსა და "დელტაკომის" ურთიერთობის დეტალებზე სასაუბროდ სასამართლო სხდომა დაიხურა და ბატიაშვილს პროკურორებმა დახურულ რეჟიმში დაუსვეს შეკითხვები.
